VIGAN CITY – Nakapidut iti paltog ngem imbes nga isukona iti autoridad, indulinna. Ti makadakes, aksidente a pimmutok ti paltog a puon ti nakayospitalanna.

Nupay naideklara a saanen nga agpeggad ti biag ni John Tabbal Rabe, 13, out of school youth, residente iti Barangay Mindoro ditoy siudad, sumango pay daytoy iti panagpalutpot mainaig iti napidutna a homemade cal. 38.

Segun iti biktima, idi agarrup 6:50 ti bigat ti Mayo 14, nasarakanna ti nasao a paltog iti igid ti baybay a sakup ti barangayda ket inyawidna sana indulin iti pandag ti punganna.

Mapapati nga iridep koma ti menor de edad idi agarup 9:45 iti dayta met la a bigat ngem idi ginuyodna ti blanketna, natinnag ti pungan agraman ti paltog ket pimmutok daytoy a nakatamaan iti makannigid a luppona.

Intaray dagiti nagresponde a polis ti biktima iti Gabriela Silang General Hospital, Tamag tapno maagasan.#