Menor de edad, bimmagsol

SINAIT, Ilocos Sur – Gapu iti panangbugkaw ken panangbato kenkuana dagiti aggiinom a kalugaranna iti Barangay Tapao ditoy nga ili, bimmagsol ti maysa a menor de edad idi rabii ti Hunio 16.

Binagsol ni Mark (parbo a nagan ta menor de edad), 15, baro, out of school youth ken residente iti Barangay Tapao, ditoy nga ili ni Rodante Yadao y Corpuz, 35, baro, mannalon, ken kalugaranna, a nakasugatan ti naud-udi iti bukotna ken makannawan a lapayagna.

Iti panagimbestiga dagiti polis, idi limmabas ti suspek iti yan dagiti aggiinom a pakairamanan ti biktima, mapapati a binugkawan dagitoy sada binato.

Kinompronta ti suspek dagiti nangbato kenkuana a nagtungpal iti pannakabagsol ti biktima.

Naitaray ti bikima iti Corpuz Clinic idinto nga inaresto dagiti nagresponde a polis ti suspek.

Insuko ti barangay tanod nga agnagan Randy Ilar ti maysa nga imuko nga agatiddog iti sumurok kumurang a 14 a pulgada agraman ti pagiggamanna. Maysa pay a jungle bolo ti nasarakan dagiti polis iti nakapasamakan ti pammagsol.

Naipan ti suspek ken dagiti narekobre nga armas iti police station ditoy para iti maikanatad a disposision.#