Menor de edad, DOA iti ospital gapu iti aksidente

SANTA, Ilocos Sur – Naideklara a dead on arrival ti maysa a menor de edad kalpasan a nakidinnungpar ti motorsiklo a minanehona iti maysa a truck iti national highway a sakup ti Barangay Banaoang ditoy nga ili idi bigat ti Enero 13.

Saanen a naidanon a sibibiag iti Metro Vigan Cooperative Hospital ni Gabriel Bajet y Bosque, 14, residente iti Barangay Mabilbila Norte, Santa, Ilocos Sur.

Bayat ti pannakaisurat daytoy, matamtaming iti nadakamat nga ospital ti kasakayna iti motorsiklo a ni Alaiza Basconcillo y Martinez, 16, awanan asawa ken residente iti Barangay Pasungol, Santa.

Kas maibatay iti blotter, agdaldaliasat ti Fuso truck a minaneho ni Edwin Diane y Perocho, 40, awanan asawa ken residente iti Project 7, Quezon City, idinto a kasinnabatna ti Motoposh motorcycle a minaneho ni Bajet idi nagdinnungparda iti pagkurbaan ti national highway a sakup ti Barangay Banaoang a nagsagrapan dagiti biktima kadagiti dunor iti nadumaduma a paset ti bagida ken puon ti nakatayan ni Bajet.#