Menor de edad a naglabsing kontra RA 9165, nadusa

BANTAY, Ilocos Sur – Malaksid nga agreport iti opisina ti barangay captain tunggal Sabado, mangipaay pay iti barangay services ti menor de edad a nakumpiskaan iti marihuana iti uneg ti pagadalanda.

Napag-anamongan ti MSWD officer ken ni Pug-os Barangay Captain Arnold V. Yangat, nga agreport ken agipaay iti serbisio iti barangay tunggal Sabado ni Andres (parbo a nagan agsipud ta menor de edad), 14, Grade 8, ken residente iti Barangay Bessang, Cabugao kas panangikarona iti basolna.

Immuna a naipaima ni Andres babaen ti guardian daytoy iti MSWDO ti Magsingal sa iti MSWDO, Cabugao para iti umisu a disposision.

Maipalagip nga idi malem ti Septiembre 23, nasukalan iti ikut ni Andres, ti maysa a tea bag a naglaon iti mapapati a bulong ti marihuana bayat ti kaaddana iti uneg ti Magsingal National High School.

Gapu ta menor de edad, saan pay a makasuan ni Andres iti panaglabsingna iti RA 9165.#