Menor de edad, nasukalan nga agtaktakaw iti tiendaan

STA. LUCIA, Ilocos Sur – Paubing a paubing dagiti tumanor a mannanakaw kas daytoy menor de edad a nasalamaan a nagtakaw, partikular iti fruits and vegetables section iti tiendaan publiko ditoy siudad idi rabii ti Hulio 27.

Ti makadakes, posible a nabayagen nga agtaktakaw daytoy suspek kas maibatay kadagiti nadumaduma a bambanag a karga ti nasukainan dagiti polis a bag iti maysa kadagiti stall a mapapati a sinerrek ti suspek.

Idi agarup 10:35 ti rabii ti Hulio 27, inreport ni Pablito N. Arcega, duty security guard, kadagiti agpatpatrolia a polis natiliwda ni Andrew (parbo a nagan gapu ta menor de edad), agbasbasa iti Don Pedro Festejo Elementary School ken residente iti Barangay Banbanaba ditoy nga ili, a nanglukat iti tent a kalub ti Nora’s Fruits and Vegetable Stand.

Nagsuspetsa ti guardia ket nangiwayatda ken ti kaduana iti panagtsek-ap kadagiti nadumaduma nga stall ket naduktalanda a nadadael ti tuktok ti JS Viernes Store, Muslim General Merchandise and Habon RTW a mapapati a simrekan ken rimmuaran ti suspek.

Nakaduktal pay dagiti polis iti maysa a bag a naikabil iti ngatuen ti karatula ti Muslim General Merchandise a naglaon kadagiti sumaganad: 3 selpon nga LK Mobile, Nokia X4 and 1 Nokia), 3 bateria para iti selpon a Nokia, Samsung ken Sunmax), 3 micro sd, 2 4G ken 1G) ; universal charger; 6 a panio; 1 box hair dye; 5 key chain; 2 ballpen; speaker, sunglass, 4 lighter; 26 fancy a singsing; 46 fancy nga aritos; 2 relo (frogman); 3 headband; 5 wristband; 9 padlock; 1 cubic box; flashlight rechargeable; 12 body piercing; screw driver; bag ken cash money nga agdagup iti P929.00.

Idi dinamag dagiti polis no kukua ti suspek ti bag, insungbatna a kukuana ken tinakawna dagiti nakakabil iti bag manipud kadagiti nadumaduma a puesto iti tiendaan.

Naipan ti suspek iti police station para iti pannakainbentario, dokumentasion, ken safekeeping dagiti linaon ti bag.

Madama ti follow-up investigation dagiti polis tapno maammuan no adda sabali pay a kakaduana.#