Menor de edad, natay iti aksidente

TAGUDIN, Ilocos Sur – Awanen ti biag ti maysa a menor de edad idi maidanon iti ospital kalpasan ti pannakainbolbar ti motorsiklona iti aksidente iti national highway ditoy nga ili idi malem ti Mayo 15.

Naideklara a dead on arrival ni Mariano Dampulas Zamora III, 17, ken residente iti Barangay Bio, ditoy nga ili idi maisangpet iti ospital gapu kadagiti sinagrapna a dunor iti nagduduma a paset ti bagina.

Segun iti report, idi agarup 1:55 ti malem ti nadakamat a petsa,  agdaldaliasat  nga agpaabagatan ti national highway a sakup ti barangay San Miguel ditoy nga ili ni Dampulas a nakalugan iti Russi 150 motorcycle a nairehistro iti nagan ti amana a ni SPO3 Mariano Zamora, Jr. ti Tagudin PNP, ket idi makadanon iti pagkurbaan, napukawna ti kontrolna iti handle bar. Nagderetso ti motorsiklo iti makannawan nga abaga ti kalsada sana dinarusdos ti bunton ti darat a puon ti pannakaipuruak ken pannakaibaltuog ti biktima iti daga.

Naitaray ni Dampulas iti Tagudin General Hospital ngem awanen ti biagna a naidanon ditoy, segun iti doktor a nangtaming kenkuana.

Mapapati nga awan ti lisensia ti biktima nga agmaneho ken saan a nakaaramat iti helmet.#