Menor de edad, pinakawan ti tinakawanna

ABUGAO, Ilocos Sur – Nagasat daytoy a menor de edad ta pinakawan ti akinkukua iti tienda a tinakawanna ket saanen a makasuan pay.

Mapapati a naasian ni Ednalyn Adona y Suniega, 39, naasawaan, akinkukua iti Andrei Grocery Store ken residente iti brgy. Bungro, Cabugao ken ni Johnny (parbo a nagan ta menor de edad) ket saanen a nagdarum pay.

Nangaramid ni Adona iti affidavit of desistance maikontra ken ni Johnny a sinuskribiran ni Asst. Provincial Prosecutor John Rey Querubin.

Saan a nailanad iti police journal no saan metten nga agdarum ni Myleen Baculo y Cabanilla, 38, naasawaan, residente iti Barangay Baclig, Cabugao, ken akinkukua iti Myna Dry Goods a tinakawan pay ti suspek.

Naireport a natakawan dagiti dua a tienda a masarakan iti public market iti Barangay Rizal idi Septiembre 6 ket narekobre dagiti natakaw kadagiti dua a tienda iti ikut ti suspek.#