Menor de edad, saan a maipalubos a sumrek amusement centers

VIGAN CITY – Maysa nga ordinansa ti naisaang iti konseho ditoy siudad a mangiparit iti iseserrek dagiti menor de edad kadagiti amusement centers kabayatan ti klase.

Sagudayen ti nasao nga ordinansa a saan a mapalubosan dagiti agtawen iti nababbaba ngem 16 wenno menor de edad nga agbasbasa iti high school a sumrek kadagiti amusement centers kabayatan ti school hours, wenno manipud alas otso ti bigat agingga iti alas 5 ti malem manipud Lunes agingga iti Biernes.

Nupay kasta, mabalin a mapalubosan ti maysa a menor de edad a sumrek iti amusement center no awan klase wenno legal holiday wenno kakuyogna ti nagannak kenkuana.

Kapaliiwan iti kallabes nga adda dagiti estudiante nga aglanglangan iti klaseda agsipud ta aguperda kadagiti amusement centers.#