Menor de edad, suspek a nagtakaw iti souvenir shop

VIGAN CITY – Menor de edad ti nagtakaw iti maysa a pagtagilakuan ditoy siudad idi agarup tengnga ti rabii ti Septiembre 24.

Daytoy ti limtuad iti inbestigasion dagiti polis mainaig iti panagtakaw iti Auring’s Souvenir Shop a kukua ni Auring Go y Ferido, 50, naasawaan, a masarakan iti Barangay VII ditoy siudad.

Segun dagiti inbestigador, maysa nga Ariel Labarias y Buenabista, 15, baro, natibo iti Calasiao, Pangasinan, ken agdama nga agindeg iti Barangay Camistizoan, Sto. Domingo, Ilocos Sur, ti nakita ti maysa a lumugar nga agdakdakiwas iti aglawlaw ti shop idi agarup 12:00 ti tengnga ti rabii ti Septiembre 24 a mapapati a pannakaiwayat ti panagtakaw iti shop.

Naduktalan laengen ni Go a natakawan ti pagtagilakuanna idi agsapa ti Septiembre 25 idi mapukpukaw ti sumagmamano nga RTWs ken dagiti bag a nakadispley iti tuktok ti lamisaan nga agbalor amin iti sumurok kumurang P50,000.00.

Maysa a Mario Amistad y Lorenzo, 56, awanan asawa ken residente iti nadakamat a barangay, ti nagkuna a nakitana ti suspek nga agdakdakiwas iti aglawlaw ti shop idi agarup 12:00 ti tengnga ti rabii.

Iti pannakaisurat daytoy, birbiroken dagiti polis ti suspek tapno mapagsaludsodan.#