Meri Krismas, Sir!

Sarita ni Jobert M. Pacnis
(Maikadua a paset)

“Diyo kayat ti agtsek?” mangrugin nga agkubbuar ti darak.

“Awan bolpenmi, sir!” impilosopo ni Nardo.

“Kasano koma a nakaeksamkayo?”

“Naibusen ti nagyanda, sir!” impabalagbag met ni Roland.

“Nakaad-adunto la ngamin ta papaanseram, sir, isu a naibusen, a!” sapay la impasaruno ni Dexter a kasta unay ti ngirsina.

Pimgaakda nga agbabarkada.

Ditan a naiburuang ti riknak.

“Secretary, may I have the attendance notebook!” kinunak. “I’ll mark them absent!”

Diak ninamnama ti inaramid ni Dexter. Timmakder ket pinigisna ti test booklet nga adda kenkuana. Idi nalpasanna, impuruakna daytoy iti tawa.

“Dexter, alaem dagiti nagannakmo ‘ton bigat!” intebbagko. “I want to talk them!”

“Aru la amin nga ammom a mestru!” inyibanagna ketdi sa rimmuar a dagus iti kuarto. Timmakder met dagiti barkadana.

“Kayatyo a suroten? Sige, go on! I’ll just talk to your parents. Do not enter anymore to my class!” Permin a kubbuar ti darak. Itaak la a mabastos iti kastoy iti unos ti panagisurok iti uneg ti walo a tawenen. Sakbay a nakastrekak ditoy, dua a pribado a pagadalan ti nagisuruak. Nupay adu met dagiti buong ti ulok kadagiti nagkauna nga aestudiantek, awan pay ti kas itoy a napasarak.

Nagsubli ni Dexter iti kuarto. Nasabatna gayam ni prinsipal iti iruruarna koma iti ruangan.

“Pinalabas mo raw siya,” kinuna ni sir.

Ta pagsalsalawasawennak pay!

Ket imbagak ti sibubukel nga inaramidna. Impakitak pay ti pinapidutko a pinigisna a test booklet.

Nakapungtot ni sir. “Bring your parents tomorrow,” ti naudi ken napnuan bileg a saona idi dina latta mapasungbat ni Dexter a nagtalinaeden nga umel iti sangoananmi.

Nagmalmalem a nadagsen ti riknak. Bastos a talaga dayta a Dexter. Nalagipko la ketdi ngarud manen ti inaramidna idi immayak nag-substitute ditoy itay napan a tawen. Agisursuroak idi iti Grade 7 a kaabayda iti kuarto idi kellaat a napanalbaag ti plywood a divider. Uray la naggunggon.

Rimmuarak a dagus ket simrekak iti kuartoda a nakaar-ariwawada ta di pay simrek ti adviser-da. Nakitak a nakaiggem iti dadael nga ima ti tugaw ket intudoda nga isu ti nangpanalbaag iti divider. Binagbagaak. Ngem kinusilapannak ketdi. Sa inaribungbongandak dagiti barkadana.

“Bakit, sasaktan ninyo ako?” kinunak.

Didak sinungbatan. Rimmuarda ket nangpidut iti bato ni Dexter. Sisasangoak idi nagngarietanna a binansag ti tawada. Nabtak ti maysa kadagiti dialosi.

Nai-office. Inkarina a dinanton ul-uliten. Suktanna kano pay ti nabtakna a dialosi. Ngem agpapan kadagitoy a nakasubliakon nga agisuro kadakuada, saanna met pay a nasuktan.
Saan laeng a siak ti pangipakpakitaanna iti kasta nga ugalina. Numero uno ditan ni Sir Labrador nga aggumgumintang dagiti ramayna no magna. Nasuroken a kuarentana ket isu ti kataengan kadakami a sangapulo ket tallo mannursuro ditoy CWNHS. Agarup kataebna laeng ti prinsipalmi. Mismo a kaarrubana ti eskuela. Maysa isuna kadagiti pioneer a mannursuro ditoy. Dagiti nakagiddanna, naidestinoda metten kadagiti luglugarda.

“Bra, bra, bra!” kasiguan ni Dexter nga ikantakanta no kasta a mapasungadanna ni Sir Ador. Dina pay awagan iti “sir.”

No ag-outdoor ni Sir Ador iti TLE a subject-na, adda la ni Dexter a mangkurkuriro kenkuana. Aglalaok ti maibagbagana.

No kasta a mapaayaban iti office, agkakamakam ti karina a dinanton uliten. Ngem agpatingga laeng iti sao. Kanayon nga ag-promissory note. A dina met matungtungpal.

Ket itoy a naaramidna, nakaikeddengakon. Diakon awaten iti subject-ko inkaso laeng nga ibaga dagiti kakaduami nga ikkanda pay iti maudi a tiansana. Nakaro unay ti inaramidna!

LEPLEPPAS ti flag ceremony, ken agsagsaganaakon a sumrek iti klasek, iti kabigatanna idi sumungad ni Konsehal Ferdinand a tatang ni Dexter iti ridaw ti office-mi. Awan ni prinsipal ta adda kellaat a nakaawaganna idiay kabisera.

Nagdaydayaw. Diniretsona ni Ma’am Ligaya Aragon, a kaabayko iti lamisaan. Simmaruno kenkuana ni Dexter a nakadumog. Idinto nga agkubbuar manen ti darak a nakalagip iti napasamak.

Imbinsabinsa ni Ma’am Aragon ken ni Konsehal Ferdinand ti inaramid ti anakna iti pa-review-k. Naibagakon ti sibubukel a napasamak ken ni ma’am.

“Pagpasensiaam mu gafa anakkun, sir,” agpakpakaasi a timek ni Konsehal Ferdinand kaniak.

“Ibagak ti agpayso a riknak kadakayo, konsehal,” kinunak met. “Nasakit unay ti nakemko iti inaramid ni Dexter. Umuna dayta a padasko iti unos ti panagisurok…”

“Maawatantaka, mistro,” nakapsut a timek ni konsehal.

“Kastaak met no siak ti nakapasamakan dayta,” insarurong ni Ma’am Aragon. “Sika pay laeng, sir, ket madin ti riknak. Anianto laengen no siak a mismo?” Sa kinitana ni Dexter: “O, ania ti makunam, Dexter… balong?”

Ngem di simmungbat ni Dexter. Nakatangad lattan iti bobeda.

(Maituloyto)