SANTA, Ilocos Sur – Methane gas ti duktal ti Department of Environment and Natural Resources nga agsingsingaw iti naipasok a tubo iti maipatpatakder a balay iti Barangay Mabilbila.
Naduktalan ti agsingsingaw a gas idi agipasok iti tubo dagiti agtrabtrabaho iti balay a kukua ni Josefina Nartates.
Segun iti opisial ti DENR, posible a nagtaud ti gas manipud iti nagrupsa a kayo agsipud ta kabakiran idi ti nasao a lote.
Kinuna ni Vice Mayor Jesus “Popoy” Bueno a dakkel a pagnam-ayan ti ilina no dakkel ti deposito ti agsingsingaw a gas iti nadakamat a barangay.#