Metro Vigan sub-area, kadakkelan pakapukpukawan koriente: ISECO

SANTIAGO, Ilocos Sur – Minilion ti pukaw ti Ilocos Sur Electric Cooperative, Inc. gapu iti mapukpukaw a koriente ket ti Metro Vigan  ti kadakkelan a pakapukpukawanna.

Daytoy ti impalgak ni ISECO General Manager Cesar Gironella ken dadduma pay nga opisial ti kooperatiba ti elektrisidad bayat ti pannakiinnuman kenkuana ti print ken broadcast media iti opisinada ditoy itay Setiembre 28.

Inangay ni Gironella ti press conference tapno lawlawagan ken sungbatan dagiti board of directors ken mangimatmaton dagiti isyo ken problema mainaig iti operasion ti nasao a kooperatiba ken ti R.A. 7832 a mangdusa kadagiti agtakaw iti elektrisidad, electric power transmission line/materials ken dadduma pay.

Saklawen ti Metro Vigan sub-area ti Vigan, Caoayan, San Vicente, Sta. Catalina, San Ildefonso, Sto. Domingo, Bantay ken Santa.

Segun ken ni Engr. Fred Jacob, ISECO Technical Services Manager, addaan ti Metro Vigan iti nasurok a 16% a system loss idinto a 14.4% met iti Sta. Cruz sub-office.

Kinuna ni Gironella a makaalarma ti nasurok a 16% a system loss iti Metro Vigan, kadakkelan no maikumpara kadagiti dadduma nga il-ili iti probinsia ken siudad a pakairamanan ti Narvacan  (11%) ken Candon City (10%) ket kasapulan nga ikkanda iti naan-anay a pannakataming tapno saan a mapadagsenan ti kooperatiba.

Dakkel a pakapukawan iti koriente ti illegal a koneksion, panaginstolar iti tampered a metro, jumper, current reversing transformer, ken dadduma pay a devices a manglapped iti umisu a panagrehistro ti makunsomo nga elektrisidad.

Kinuna ni Gironella nga agingga iti 14% laeng ti system loss nga ipalubos ti EPIRA a singiren ti kooperatiba ket no nangatngaton ngem iti daytoy, ti ISECO ti mangibaklayen iti pukaw nga ipasana a bayadan dagiti consumers.

Kanaig daytoy a problema, kinuna ni Gironella a panggep ti opisinada ti pannaka-cluster dagiti metro iti Vigan City tapno maiyadayoda kadagiti agtaktakaw iti koriente.

Kabayatanna, inkalintegan dagiti kameng ti hunta direktiba ti kooperatiba a saanda nga inaprobaran ti singasing a maipababa ti reconnection fee ken penalty fee dagiti delingkuente nga agbaybayad a consumers tapno mataginayon ti nangato a collection efficiency ti kooperatiba ken madisiplina dagiti delingkuente a consumers tapno saan a mairamraman dagiti saan nga agliwat nga agbaybayad iti koriente.

Dinakamat pay ni Gironella a 90% ti collection efficiency ti ISECO maigapu iti nainget a panagkolektada ken panangipakatda kadagiti paglintegan ti kooperatiba, saan a kas kadagiti dadduma a kooperatiba ti elektrisidad kadagiti sabsabali a probinsia a kaadduanna ti agpukpukaw.

Kinunana a no agbaybayad ti kooperatiba iti naituding a tiempo, agsubli met la a benepisio kadagiti consumers babaen iti naipababa a bayadanda iti makunsomoda a koriente. (Karaman ti report ni Danny Antalan)