Miembro ti PAG, napilaan panagsalungasing iti election gun ban

SAN FERNANDO CITY – Napilaan iti panagsalungasing iti election gun ban ti maysa a masuspetsa a miembro ti private armed group (PAG) ditoy a probinsia.

Napilaan ni  Fernando Tagudin Asprec, 43, naasawaan, residente iti Barangay Ortiz, Naguilian, La Union iti panagsalungasing iti RA 8294 wenno illegal a panagikut iti armas, pakainaigan iti Comelec Resolution No. 9028 wenno election gun ban. Nai-docket ti kasona iti babaen ti CC No. 4049BG iti regional trial court ti Bauang, La Union.

Segun ken ni Police Chief Inspector Efren Geraban, hepe ti polis ti Naguilian, naaresto ni Asprec iti uneg ti maysa a videoke bar nga adda ikutna nga armalite M-16 rifle (Elisco) nga addaan iti magasin a naglaon iti 23 a bala.

Kinuna pay ti polis a nakalista ni Asprec a miembro ti private armed group nga agop-operar iti probinsia iti babaen ti maysa a naabak a kandidato politikal iti La Union.

Kinuna met ni Police Senior Supt. Ramon O. Purugganan nga agtagikua pay ni Asprec iti maysa a cal. 45 pistol a nairehistro iti naganna  ken addaan iti lisensia nga agpatingga inton Oktubre 1, 2011.

Innayon ni Purugganan a naireportnan dagiti dua a rehistrado a paltog ni Asprec iti Firearms and Explosives Division (FED) iti Camp Crame ken ti kiddawna para iti pannakarebokar ti lisensia daytoy.

Kabayatanna, indagadag ni Police Chief Supt. Orlando M. Mabutas, regional director, kadagiti hepe ti polis ti panangipakatda iti napigpigsa a kampania maikontra iti panagraira dagiti partisan armed groups ken iti naing-inget a panangisayangkatda iti checkpoint operations iti sibubukel a probinsia tapno masigurado ti urnos ken talna iti nasao a lugar.#