Militar, polis, nagmula iti kayo iti Tumayaw Village

BANAYOYO, Ilocos Sur – Nakipagmula iti kayo dagiti soldado, polis, estudiante ken empleado dagiti nadumaduma nga ahensia ti gobierno iti Tumayaw Village, Barangay Elefante, Banayoyo itay nabiit.

Segun ken ni Bliss Castillo, coordinator ti aktibidad, nakipartisipar iti tree planting ti 51st Infantry Battalion ti Philippine Army babaen ti panangidaulo ni Lt. Col. Desiderio Alaba, batallion commander, Philippine National Police iti panangidaulo ni PSI Marcelo Martinez, estudiante ken mangisursuro ti Banayoyo National High School ken empleado dagiti sabsabali pay nga ahensia ti gobierno.

Nagdalus pay dagitoy iti bakras ti bantay a nagmulaanda iti kayo.

Naipasdek ti Tumayaw Village babaen ti gobierno probinsial ket ditoyto ti manamnama a pakaisayangkatan dagiti aktibidad dagiti nadumaduma a tribu iti probinsia.

Kabayatanna, siam a barangay ti makipartisipar iti tribal festival nga angayen ti siudad ti Candon. impakaammo ni Bokal Robert Tudayan itay nabiit.

Maibilang ditoy ti  Barangay Palacapac, Cubcubboot, San Andres, Santo Tomas, Bugnay, Bagani Tocgo, Bagani Gabor, ken Calaoaan.#