Footer

Militarisasion dagiti sibilian nga opisina ti gobierno

NABAYAGEN nga aglaklak-am iti nagduduma a kritisismo ti agdama nga administrasion iti pannakadutok dagiti retirado a heneral ken dadduma pay nga opisial ti Armed Forces of the Philippines ken Philippine National Police kadagiti nagduduma a departamento ken ahensia ti gobierno.

Mababbabalaw ni Presidente Rodrigo Duterte iti panangdutokna kadagiti adu a retirado a heneral iti gabinetena ta patien dagiti kritikona a paset dayta ti militirasision a pangtengngelna iti AFP ken PNP tapno agnalinaed dagiti military ken polis a napudno kenkuana ken iti administrasion. Saan a mailibak nga uray no retiradon dagiti heneral ket natibker pay laeng ti impluensiada kadagiti aktibo nga opisial ken kameng ti AFP ken PNP nangruna dagiti nagturpos iti Philippine Military Academy a kaaduan kadakuada ket nagakem a Chief of Staff wenno PNP chief, a mabigbig ti agtultuloy a panagraemda kadagiti immun-una a nagturpos ngem isuda iti PMA.

Awan ti malabsing a linteg iti pannakadutok dagiti retirado nga opisial ti AFP ken PNP kadagiti saan nga armado nga ahensia ti gobierno ta kualipakadoda met, ken natennebda iti padas iti panagserbi iti gobierno. Ngem nakadkadlaw ti panangidumduma ti Presidente kadagiti retirado a heneral ken uray aktibo dagiti aktibo nga opisial ken miembro ti AFP ken PNP.

Iti agdama, sigud nga agpapada a retirado a heneral dagiti nakapuesto kadagiti nabileg a departamento: ni Delfin Lorenzana iti National Defense, Eduardo Año ti Interior and Local Government, Roy Cimatu ti Environment and Natural Resources, ken manamnaman ti pannakadutok ni Rolando Bautista iti Social Works, Welfare and Development. Sabali pay dagiti dadduma a retirado a heneral a naiwaras kadagiti nagduduma nga ahensia ti gobierno.

Nadegdegan dagiti kritisismo iti militarisision dagiti sibilian nga opisina iti gobierno kalpasan ti panangimandar ti Presidente iti military takeover iti Bureau of Customs nga adda iti salinong ti Department of Finance kabayatan ti kontrobersial iti pannakaipuslit ti 1.6 tonelada nga agbalor iti P11 Billion ti balorna nga illegal a droga iti Port of Manila, ken pannakasukat ni sigud a BOC Commissioner Isidro Lapeña a nadutokan a baro nga nga Administrator ti Technical Education and Skills Development Authority, babaen ken ni Rey Leonardo Guerrero, sigud nga AFP Chief of Staff, ken Maritime Industry Authority Administrator. Napasamak dayta kalpasan ti pannakaikkat dagiti deputy commissioners iti panawen ni Lapeña, ken immandar ti Presidente iti pannakayakar iti “floating status” wenno awan ti destino dagiti amin a department heads.

Kuna dagiti kritiko ti Presidente nga “unconstitutional” ti military takeover iti BOC gapu ta saan pay a napasamak dagiti situasion a panagturay ti “lawless elements” iti dayta nga ahensia a mababbabalaw gapu ti panagraira ti kurapsion ken panagkunniber. Pagduduaanda pay ti magapuanan dagiti madestino a military iti BOC iti kabaelanda mainaig iti koleksion iti buis ken taripa, ken pannakaipakat dagiti pagannurotan nga inyetnag ti Department of Finance.

Adda dagiti kumanong iti addang ti Presidente a temporary military takeover iti BOC tapno madalusan ti ahensia. Ngem mapagduduaan no mayanatup iti padas ken kabaelan dagiti military a mangmanehar iti BOC ken no kasano ti kapautda nga agtakem iti BOC.

Impalgaken ni AFP Chief of Staff General Carlito Galvez a nakasagana dagiti military nga agtakem iti BOC babaen ti mandar ti Presidente kas Commander-In-Chief. Ngem saan kadi a ti kangrunaan nga akem ti AFP ket ti mangpatalged iti seguridad ti Pilipinas kontra kadagiti external and internal forces a pangta iti seguridad dagiti Pilipino kas ti iraraut ti puersa ti ganggannaet a pagilian, ti rebelion dagiti komunista a grupo ken Islamic forces, ken panagraira ti terorismo?

Patien ti Presidente a ti military takeover iti BOC ket nasken unay tapno naan-anay a madulasan ti ahensia a nagbalinen nga umok ti kurapsion, technical smuggling ken pagiserkan ti illegal a droga. Ngem naan-anay ngata ti kinatalged daytoy nga addang, nga uray ti AFP ket namantiaan met iti kurapsion iti naglabas, kas ti fund conversion ken pabaon controversy iti naglabas?

Uray ni Senador Panfilo Lacson a nagturpos iti PMA ken sigud nga opisial ti Philippine Constabulary, ken Chief ti Philippine National Police ket nagpangadua iti kinaepektibo ti military takeover iti BOC. Impalagipna nga idi Dekada 60 ket nadestino dagiti agkabannuag ken idealismo nga opisial iti AFP a saan a maimpluensiaan dagiti politiko babaen ti pasuksok, ngem nasulisogda idi naappananda kadagiti napipintas a babbai.

Ti military takeover iti BOC, ket ipaneknekna ti kinaawanen ti namnama a madalusan pay ti ahensia a napusgan nga agkolekta iti buis ken taripa dagiti maiserrek a kargamento kadagiti amin a Puerto iti pagilian. Iti nasurok a dua a tawen iti turay ni Duterte, ket dua a sigud nga opisial ti AFP dagiti nangidaulo iti BOC, da Rafael Faeldon, sigud a kapitan iti Marines, ken sigud a Heneral Lapeña. Intugotda iti BOC dagiti padada a sigud nga opisial ti AFP ken nagakem kadagiti kangrunaan a posision.

Ngem ania ti nagapuanan da Faeldon ken Lapeña iti BOC? Nagraira iti kurapsion ken pannakaiserrek iti tinoleda nga illegal a droga. Itan, simmukat manen kas commisioner iti BOC ti sigud a heneral ti AFP ken dagiti pasurotna a retirado ken aktibo a militar. Mapaksiato ngatan ti kurapsion, smuggling ken pannakaipuslit ti illegal a droga? #

,