VIGAN, Ilocos Sur – Nailunsad ti milk feeding program itay nabiit tapno mapabassit ti bilang dagiti ubbing nga agkurkurang iti nutrision.
Kinuna ni Gov. Ryan Singson a nailunsad daytoy a programa iti sumagmamano nga ili iti First District a pakaibilangan ti Caoayan ken Magsingal ngem maikalawanto daytoy tapno mairaman dagiti nadumaduma nga ili iti maikadua a distrito.
Kinuna ti gobernador a proyektona pay la daytoy idi diputado iti umuna a distrito ngem itultuloyna daytoy kas gobernador ket karamanen dagiti ili iti maikadua a distrito.
Kinuna ni Singson nga umuna a prioridad a programana ti edukasion isu a nangipatakder iti 47 a pagadalan ken nagiwaras kadagiti school supplies.
“No adda school rooms, ken school supplies, masapul nga adda met inspirasion dagiti ubbing a mapan agbasa ket isu daytoy ti milk feeding program,” kinuna ni Singson.
Kinuna ti gobernador a gumatang pay ti gobierno probinsial kadagiti panggatasan a baka tapno adda pagtaudan ti gatas nga inumen dagiti ubbing.#