: Minerva del Mar alias Maribeth Perez | Tawid News Magazine - Weekly Ilocos News 📰

Minerva del Mar alias Maribeth Perez

Sarita ni Salvador A. Espejo

IMPUSOT ni Bernard iti bagina iti sementado a pagtugawan nga asideg iti ampir ti ababa a landok a pannakaalad ti dan-aw iti Burnham Park. Impalawlawna ti panagkitana iti aglawlaw a daydayasen ti lumabaga a lawag ti agpakadan a malem. Dimmanon iti yanna dagiti garikgik dagiti agbilbilog iti dan-aw.

Immanges iti nauneg ni Bernard idinto a nagliad iti tugaw sana inaprosan ti rupana. Imbulosna ti nauneg a sennaayna.

Kasangayna ita. Kadennana koma ni Milagros. Ngem idi kalman, naduktalanna ti napait a kinapudno: adda gayam kainnagawna iti ayat ni Milagros!

Ah, daytoyen ti kalidayan a kasangayna!

Immagibas iti panunotna ti nalibnos a rupa ni Milagros, ti kasla mangaw-awis a paludipna, ti kallidna nga agalikuno no umisem, ti nalag-an ken makaay-ayo a lunglung-ayna, ti….

Dua a tawen a kaayan-ayatna ni Milagros. Inay-ayatna a sipupudno. Nagtalek a subadan met ni Milagros iti umasping a pammateg. Ngem idi kalman, nakitaray ni Milagros. Iti pay met nasinged a pagayamna!

Immanges manen ni Bernard iti nauneg. Talagan sa a malas iti ayat. Daytoyen ti maikatlo a pannakapaayna iti ayat. Ni Jasmine, ti immuna a nobiana, nakisina kenkuana idi makasirpat iti nabaknang a negosiante. Kasta met laeng ni Anjanette, pimmanaw gapu ta nasisirap iti sileng ni pirak.

Nagtupa ti sangi ni Bernard. Nalamiis ti pul-oy a mangay-ay-ayam iti rupana ngem kasla mapuypuyotan ti beggang iti barukongna.

Mangliliput amin a babbai! nairidisna iti unegna. Napukawen ti panagtalekna kadakuada!

Sangaasmang ti limmabas iti nagtugawanna. Nagmayat ti panagkibinda a nangpanurnor iti berde a karuotan sada nagtugaw iti sirok ti narukbos a kayo. Nakaragragsak ti ti panagpatangda bayat ti panagsadag ti babai iti abaga ti lalaki. Naggasaten a parsua, simngay iti panunotna. Kastada koma met ken ni Milagros no saan a liniputan daytoy.

Dina napupuotan a kinarawa ti nabungkong a petakana. Nasurok a kinse mil ti linaonna.

Nairanta a gastuenna koma ti kuarta iti panagkasangayna. Talaga nga insaganaanna ti pannakayanakna a planona a rambakan iti denna ni Milagros. Manganda koma iti nalatak a restaurant, agbuyada iti sine sada agnight club iti karabianna.

Ngem awanen ni Milagros…

Ita, adda ditoy Burnham Park, agmaymaysa, awan masnop a turongenna, kawaw ti panunotna…

Maysa manen a nauneg a sennaay ti imbulosna. Nagsadag iti tugaw. Papananna? Dina met kayat ti maisar-ong kadagiti lugar a nagbalin a saksi dagiti naragsak nga aldawda ken ni Milagros. Ad-adda laeng a pasaemenda ti sugat a naipalay iti pusona.

Nadlawna laengen dagiti saka a nagsarimadeng iti sakaananna sa ti nalamuyot a timek: “Mabalin ti makikatugaw?”

Nagpangato ti panagkitana. Nagkaradap ti matana iti nasabang a patong a kinepkepan ti pangileten a maong a pantalon, ti nasippukel a pammagi a nagrusodan dagiti nabaknang a munturod nga agpilit a sumari iti puraw a tisirt, sa nagsaltek iti simmantita a rupa a nakaitampokan dagiti nangisit ken paningkiten a mata nga itan sipapasnek (gumawgawawa?) a mangmatmatmat kenkuana.

“Mabalin?” inulit ti babai.

“Apay ket a saanen?” insungbat ni Bernard. “Publiko a pagpalpaliwaan ti parke ket karbengan amin nga umay ditoy ti agtugaw iti kayatna a pagtugawan.”

“Agyamanak,” immisem ti babai. Iti panagtugawna, simmangbay ken ni Bernard ti apagapaman nga ayamuom ti bangbanglo a dina ammo ti naganna.

Adda nagparikna ken ni Bernard. Adu met ti bakante a pagtugawan ngem apay nga iti yanna ti napili ti babai?

Adda dagiti madamdamagna kadagiti kaopisinaanna a babbai a masiksikkarudda iti Burnham Park. Maysa kadi met ti babai a kalapati a nababa ti tayabna?

Inlimedna a pinalabsan ti babai iti abayna. Langana ti saan a makapettak iti bulong. Ngem no dadduma, makaallilaw ti langa. Kas ken ni Milagros, agingga ita dina maannugot a maaramidna ti mangliput.

Timmaliaw ti babai ket nagsabat ti panagkitada. Iniseman ti babai.

“Di met ngata dakes no agam-ammota,” kinuna ti babai. “Siak ni Maribeth… Maribeth Perez.” Intanggayana ti dakulapna.

Inallawat ni Bernard ti dakulap ni Maribeth idinto nga insungbatna: “Bernard ti naganko. Bernard Bravo.”

“Dimo koma kunaen a mannakibiangak,” pinaludipan ni Maribeth. “Ngem nabayagen a palpaliiwenka.  Malidlidayka. Mariknak, nadagsen unay ti problemam ket dimo ammo ti aramidem tapno maalay-ayam.”

“Adda problema iti biag amin a parsua,” nakuna ni Bernard. “Manipud pannakaitaona, ramenen ti biag ti maysa a parsua dagiti parikut. Santo laengen agpatingga dagiti parikut iti panangipulangen ti tao iti biagna iti Namarsua.”

“Wow, nauneg nga Iluko dayta,” nagkatawa ni Maribeth. “Mannuratka kadi?”

“Agpapaayak nga editor iti Tawid Magasin,” nakuna ni Bernard. “Adda metten sumagmamano a saritak a naipablaakko.”

“Kadi?” immisem ni Maribeth. “Su met la a seriosoka. Ngem panagkitak, nauneg ti problemam. Maipapan iti ayat, saan?”

Saan a simmungbat ni Bernard. Impalladawna ketdi ti panagkitana kadagiti agbilbilog iti dan-aw. Dina napupuotan ti sennaay a napasut iti barukongna.

“Saanmon a sungbatan,” inyatipa ni Maribeth. “Ammokon ti  baliksem. Ngem nalaka laeng a maiwagsakmo ti dagensenmo…”

“Kasano?” pinangtingiting ni Bernard iti kaabayna nupay adda pamalpalatpatanna iti paripirip ni Maribeth.

“Awisenka a mangpalabas ti rabii… iti dennak!”

Pudno ti atapna, sisikkaruden ti babai! Sabagay, adda pamuyaan ni Maribeth. Manen, nagkaradap ti mata ni Bernard iti apagbingngi a bibig ken kadagiti munturod ni ayat a kapkapnekanna a mamaggurigor kadagiti padana a lalaki tapno agsebbada a kumalay-at iti rawis a pagpikpikapikan ti biag ken sangaribu nga ipapatay!

“Ania, mapnekka met laeng iti makitam a pakabuklak?” inwang-it ni Maribeth ti pagat-abaga a buokna ket nagaringgen ti natangsit a barukongna.

“Pimmasaka iti pagrukodak,” kinuna ni Bernard. “Dayta laeng no agkaayatanta iti presio. Mano?”

“Lima ribu laeng.”

Nagwingiwing ni Bernard. “Nangina unay,” kinunana. “Sumapulka laengen iti sabali.”

“Nalaka ketdin dayta agsipud ta birhenak pay laeng,” imperreng ni Maribeth. “Sika ti umuna a lalaki a mangikut kaniak…”

Minatmatan ni Bernard ni Maribeth ket pinadasna a batoken ti kinapudno ti imbaga ti balasang.

“Ammok a dika mamati,” kinuna ni Maribeth, “ngem apay a dimo takuaten no agsasaoak iti pudno wenno saan?”

“Apay a siak? Nagadu a lalaki,” kinuna ni Bernard. Ibagbaga ti maysa a paset ti kinataona nga agsasao Iti pudno ni Maribeth. Ngem kinutina met laeng ti abagana. Iti daytoy moderno a panawen a nawaywaya ti panagtignay ken panagpampanunot dagiti babbai, nagbalin nga aleng-aleng ni ayat. Naaringanen dagiti babbai iti kultura ti Lumaud a mamati iti pre-marital sex ken nangiwagsak iti kinasagrado ti kallaysa. Ita, adtoy ti maysa a Maribeth Perez nga awan alumiimna a mangitanggaya iti apagkanito a ragsak nga adda kaibatoganna a pirak, adda kadi pay pateg ken kaipapanan ti kinabirhen?

“Agpayso, adu ti masikkarudko a lalaki,” nabannayat ngem nabatad ti balikas ni Maribeth. “Nalaka laeng a mapanak kadagiti pagpalpaliwaan. Naruay dita dagiti makuarta a lallaki, sisasagana a gumasto iti kanito a magustuanda ti babai. Ngem karbengak met a pilien ti pangipasagak iti kinabirhenko, saan kadi? Matalek ti langam. Siguro, nasin-aw ti panagpuspusom. Iti panangpalpaliiwko kenka, mariknak nga agtalekak kenka a saan a manggundaway kaniak.”

“Paspasablogannak laeng,” nagkatawa iti nakapsut ni Bernard.

“Nagbiddutka. Nagtaud iti kaunggak ti sinaok. Wenno siak ti nagbiddut iti panangrukodko iti kinataom?”

Ginandat ni Maribeth ti tumakder ngem inggawid ni Bernard.

“Ala, wen, nangabakka,” nakuna ni Bernard. “Umabuloyak iti presiom. Ngem iti maysa a kondision…”

“Ania kadi?”

“Kayatko ti agrambak iti daytoy a rabii. Kadduaennak, okey?”

Iti apagbiit, nasiputan ni Bernard ti yaablat ti panagduadua (amak?) iti rupa ni Maribeth. Ngem idi agangay, immisem met laeng.

“Dayta la gayam. Sige, umanamongak,” kinunana.

Nakusnaw ti simmabat kadakuada a lawag idi sumrekda iti Hot Stuff, maysa kadagiti nalatak a paginuman iti siudad a masansan a paguperanda nga aggagayyem no kaaw-awatda ti sueldoda. Nasapa pay ket manmano laeng dagiti umin-inom. Madama nga agkankanta ti maysa a babai a kustomer, paspasurotanna ti kanta nga “Are You Lonesome Tonight?”.

Pinili ni Bernard ti lamisaan iti suli. Nasiputanna ti panagtalangkiaw ni Maribeth. Damona ti umadak iti daytoy a disso?

Sineniasan ni Bernard ti babai a serbidora.

“Ania ti kayatmo nga inumen?” sinaludsodna ken ni Maribeth. “Beer?”

“Diak umin-inom iti serbesa. Softdrinks laeng,” insungbat ni Maribeth.

“Kasangayko ita,” nakuna ni Bernard. “Kayatko ti agragsak iti daytoy a rabii. Nagtulaganta a kaduaennak, saan kadi?”

“Sige ngarud,” nakuna ni Maribeth.

Nagorder ni Bernard iti uppat a serbesa agraman pulotan.

“Dika madanagan,” pinisel ni Bernard ti ima ni Maribeth. “Mapagtalkannak, dayta ti imbagam, saan kadi? Laeng no paspasablogannak.”

“Nagbiddutak kadi?” sinaludsod ketdi ni Maribeth.

Nagkatawa iti nakapsut ni Bernard. Isu met a sumangpet ti inorderna a mainom ken pulotan.

Pinakbuanna ti basona iti serbesa. Inurayna a pakbuan met ni Maribeth ti basona.

“Cheers iti kasangayko…,” kinuna ni Bernard sana intupa ti basona iti baso ni Maribeth.

“W-wen, para iti naragsak a kasangaymo,” insungbat ni Maribeth.

Naggiddanda a nangitangnguap iti basoda. Nasiputan ni Bernard ti panagrupanget ni Maribeth a nangtilmon iti serbesa.

Manen, simngay ti panagduadua iti panunotna. Talaga a saan nga umin-inom ni Maribeth iti serbesa wenno nalaing nga artista?

Maysaka a misterio a takuatek ita a rabii, naitanamitimna,

Naibbus ti inumenda. Nagorder manen ni Bernard iti uppat.

“Malaksid ti naganmo, diak pay ammo no taga-anoka, Maribeth,” kinuna ni Bernard.

“Taga-Sinait, Ilocos Sur.”

Nagtung-ed ni Bernard. Nupay agtrabtrabaho iti Baguio, puro nga Ilokano. Nayanak iti Cabugao, kaparanget nga ili ti Sinait. Adu ti am-ammona iti Sinait.

“Dimo saludsoden no taga-anoak met. No ania ti pagsapulak? No baro wenno addan asawak?”

“Nasken kadi?” insungbat ni Maribeth.

“Dika masdaaw no apay a rambakak ti kasangayko iti denna ti diak am-ammo a babai … sika?”

“Panagkunak, saanen a masapul,” kinuna ni Maribeth. “Kalpasan daytoy a rabii, agbalinakto laengen a maysa a panid iti biagmo. Maysa a rabii nga awanan iti kaipapanan… malaksid iti apagdarikmat a ragsak a sagrapem iti saklotko.”

Nasdaaw ni Bernard iti insawang ni Maribeth. Dina ammo ngem adda nasagid iti kaungganna. Ania ngata no nasarakanna daytoy iti sabali a disso iti sabali a panawen?

Nagorder manen ni Bernard sa nagpakada a mapan iti pagisbuan. Idi agsubli, addan dagiti inorderna nga inumen. Pakbuanna koma ti basona idi madlawna a napunno. Nagkuretret ti mugingna. Kapkapnekanna nga awanen ti naggian ti baso sakbay a napan immisbo.

Tinaldiapanna ni Maribeth a mangpakpakbo iti basona iti serbesa.

Ni la ketdi Maribeth ti nangpunno iti basona. Kellaat adda nabukel a suspetsa iti isipna. Adda kadi innayon ni Maribeth iti inumenna?

“Madikan?” kinuna ni Maribeth. “Mayaten ti buelona kaniak.”

Impaigid ketdi ni Bernard ti basona.

“Nagbaliw ti panunotko,” kinunana. “Mapantan iti otel. Sadiay ti pangituloyanta ti panangrambakko iti kasangayko.

Manen, nakitana ti pannakayurit ti amak iti rupa ni Maribeth.

“Agsanudka kadin iti nagtulaganta?” pinangtingiting ni Bernard iti karirikna ni Maribeth. “Mabalinta ti agsina dita ruar.”

“Saan!” namedmed ngem nabatad ti timek ni Maribeth. “Sumurotak uray sadino ti papanam!”

Sinitsitan ni Bernard ti serbidora ket nagbayad. Timmakderda. Idi siketenna ni Maribeth iti iruruarda, nariknana ti panagkitakit ti balasang. Ngem inawidna idinto a nangayab iti taksi.

Pinaliiw  ni Bernard ni Maribeth idi sumrekdan iti otel. Nagtalangkiaw daytoy a kasla maamak nga adda makakita kenkuana iti lobby.

Kalpasan ti panagbayad ni Bernard, limmuganda iti elebeytor.

“Mabalinmo pay ti agsanud,” kinunana.

Immanges ketdi ni Maribeth iti nauneg.

Linuktan ni Bernard ti kuartoda. Pinaunana ni Maribeth. Naannad a nagtugaw ti balasang iti pingir ti katre.

Inrikep ni Bernard ti ridaw ket minatmatanna ni Maribeth a kumitkita met kenkuana. Pampanunoten laengen ni Bernard nga isu ti mangbusat iti kinababai ti balasang, umanayen a mangparasuk iti darana. Kabarbaro daytoy a padas kenkuana.

Nagtugaw iti abay ni Maribeth ket inagkanna ti lengnges daytoy. Immallatiw ti bibigna iti pingping sa iti agar-arimasa a bibig ti balasang. Napakiet ni Maribeth.

“O, apayen?” nasdaaw ni Bernard.

“Nalamiis unay ti kuarto,” kinuna ni Maribeth. “Agpapudotta pay. Pagpatured…”

“Dayta la gayam,” nakuna ni Bernard. Inagkanna ni Maribeth. Induron ti balasang sana insenias nga agorder pay iti mainom ken fried chicken.

Asinoka, Maribeth Perez? naitanamitim ni Bernard. Saanna nga impadlaw ti kumarkaro a suspetsana. Kayat a barteken ni Maribeth? Ania nga ay-ayam ti iwaywayat ti balasang?

Aniaman dayta, nakasaganan ni Bernard. Naplanonan ti aramidenna.

Nagtelepono ni Bernard iti baba ket nagbilin iti brandy ken fried chicken.

Inasitganna manen ni Maribeth. Inawidna. Nagdakiwas ti imana. Induron ni Maribeth idinto nga inakkalna ti kannigid nga ima ni Bernard a nairakus iti siketna.

“Very hotka unay,” kinuddot ti balasang ni Bernard. “Inton madamdama kadi.”

“Diakon makatutor,” nakuna ni Bernard.

“Agdigoska pay,” insingasing ni Maribeth.

“Umannugotak iti kunam,” nagtung-ed ni Bernard.

Agsagsagawisiw ni Bernard nga immuneg iti banio. Makapasalibukag ti danum. Inis-isuanna a nalaing ti bagina bayat ti panagkantana. Kayatna nga ipangeg iti balasang tapno saanna a madlaw ti panagsuspetsana. Ammona, adda plano ti balasang kenkuana. Dayta ti kayatna a takuaten.

Iggem ni Bernard ti pantalon ken badona, in-inut a linukipna ti ridaw sa simmirip iti kuarto. Nalawag a makita ni Bernard ti ar-aramiden ti balasang ta masikiganna ti sarming.

Nagkusipet ti mata ni Bernard idi makitana nga adda pulbos nga impakbo ni Maribeth iti maysa a baso. Kalpasanna, binukbokanna iti arak.

Dinagdagus ni Bernard ti nagsubli iti banio. Namulenglenganna ti sarming. Nakaemna ti sangina. Ammona lattan a pagpaturog ti inlaok ni Maribeth iti inumenna. Masinunuona itan a kayat a sikapan ni Maribeth!

Ti la ketdi kuartana ti gamgamen ti balasang kenkuana!

Ha! Kastoy kadi kangisit ti kararua daytoy a babai?

Immapay iti panunotna dagiti gagayyemna a nabiktima dagiti nasikkarudda a babbai. Napainomda iti pagpaturog. Idi makariingda, naitarayen ti babai nga inhotelda dagiti kuarta, singsing ken reloda!

Nagburek ti dara ni Bernard. Namrayanna ti immanges iti nauneg tapno pasimbengenna ti riknana. Naamirisna a dakkel nga eskandalo ti maparnuay no tutopanna ti babai.

Inkeddengna ti makisinnirib kenkuana. Kitaek man ti pagpatinggaan ti sikapmo! nakunana.

Nagsagawisiw ni Bernard idi rummuar iti banio. Impigpigsana ti panangirikepna iti ridaw. Kinermanna ni Maribeth a nakasikkawil itan a mangsissisip iti basona a naglaon iti arak.

Pinalabsan ti matana ti pakabuklan ti balasang. Nagsabat dagiti matada. Pinadasna a basaen ti karirikna ti balasang. Gagar a natibnokan iti amak ti ibalbalikas dagiti matana?

“Ne, uminomka pay,” pinidut ni Maribeth ti baso a pinakbuanna iti pulbos sana intanggaya ken ni Bernard.

Inawat ni Bernard ti baso ngem indissona iti rabaw ti lamisaan. Sinagaysayna ketdi ti buokna.

“Sumublatka met nga agdigos,” nakunana. “Hustonto a mainomko daytoy naibaso no makadigoska.”

“Dayta koma ngarud ti aramidek,” immisem ni Maribeth. Nagkinni a simrek iti banio.

Apaman a naglitek ti rikep ti banio, dagus a pinagsinnukat ni Bernard dagiti baso. Nagtugaw iti pingir ti katre ket nagpanunot. Adda ngata kadua ni Maribeth nga agur-uray iti baba? Nadamdamagnan a kasta ti operasion dagiti sindikato.

Inlukatna ti ruangan ket winanawananna ti pasilio. Awan tao. Simmapideng iti abay ti tawa ket nagpaliiw. Awan ti makitana iti ballasiw ti kalsada a nakaistambay. Napnek. Agmaymaysa ni Maribeth.

Sangapulo minutosen, di pay la nakadigos ni Maribeth. Ammona nga ipadpad-eng ti balasang ti rummuar. Ur-urayenna la ketdi ti isasamay ti pagpaturog nga inlaokna iti inumenna.

Madamdama, naglitek ti ruangan ket nayula ni Maribeth. Nabigkes ti bagina iti tualia. Nagandap ti napudaw ken nawasnay a luppona.

Nadlawna a pinalabsan ti balasang ti awanen naggian a basona. Nagsaltek dagiti mata ni Maribeth kenkuana iti katre. Nagpammarang a makaturturog. Nasiputanna ti yiisem ti balasang.

“Natektekanka kadi?” sinaludsod ni Maribeth.

“Nagbayagka metten,” nginalngal ni Bernard ti timekna.

“Aniat’ napasamak iti timekmo?”

“Diak ammo, agtabbed metten. Ken mayat ti umay a tuturogak.”

“Agurayka, ta inumek pay ti bagik,” pinidut ni Maribeth ti basona sa limmidok.

“Darasem a,” indagdag ni Bernard.

“Ibbusek laengen daytoy,” limmidok manen ni Maribeth. Iggemna ti baso a nagtugaw iti sukayan ti kama.

Namindua pay a limmidok ti balasang. Awanen ti linaon ti baso idi idissona.

Bimmangon ni Bernard. Sinappuyotna kam’ pay ti ulona. Natnag iti katre.

“Nabartekak sa metten,” nakunana.

Nagkatawa ni Maribeth. Immasideg ti balasang sana inatibay ni Bernard.

Dayta ti inur-uray ni Bernard a gundaway. Inawidna ni Maribeth. Natuangda iti katre. Inagkanna ti balasang iti napaut idinto a winarwar ti imana ti tualia a naiputipot iti bagi daytoy.

“Agurayka kadi,” nakuna ni Maribeth.

“Nagbanglokan,” kinuna ketdi ni Bernard ket inet-etanna nga inarakup ti balasang.

Naggulagol ni Maribeth ngem dina pinalusposan. Nagpapas a nangagek kenkuana. Nagdakiwas dagiti imana. Birhen nga agpayso ni Maribeth!

Intukod ni Maribeth ti imana sana impennek nga induron ni Bernard. Nakaruk-at. Dinagdagusna ti bimmaba iti katre. Natuang. Pinilitna ti tumakder babaen ti ikakapetna iti pingir ti tokador.

“I-inallilawnak,” nayurit ti amak iti mata ni Maribeth a nangtaliaw ken ni Bernard. Saan a nailinged ken ni Bernard ti aligagaw iti timekna.

Nagpusipos ni Maribeth ket inkarigatanna a gaw-aten ti seradura ti ruangan. Di pay nakaaddang iti mamindua, naarinuknoken.

Sinakruy ni Bernard ti balasang ket impaiddana iti katre. Inulsanna. Linuktanna ti bag ket imbukbokna dagiti naguneg iti rabaw ti tokador. Pinidutna ti petaka iti ummong dagiti sagaysay, pulbos, lipstick ken pappapel. Inuyosna ti ID card a nairapit. Minerva del Mar ti naganna. Tubo ti Vigan City, Ilocos Sur. Agdagus iti Fairview, Quezon Hill, Telephone Number 074-446-072. Balasang pay. Agtawen iti 20. Agpapaay a clerk iti Riego’s Enterprises a masarakan ti opisinana iti puseg ti siudad.

Pinidut ni Bernard ti auditibo ket immawag iti dagus ni Minerva. Babai ti simmungbat.

“Ditoy kadi ti pagdagusan ni Minerva del Mar?” inamad ni Bernard.

“Wen, Manong. Apay kadi?”

“Di la mabalin a kasaritak biit?”

“Awan ni Minerva, Manong. Binalonanna ni Manong Jefferson iti Montemayor Medical Center.”

Nagyaman ni Bernard. Indissona ti auditibo. Naaprosanna ti timidna idinto a minatmatanna ti matmaturog a balasang. Ania a misterio ti ik-ikutan ni Minerva del Mar, alias Maribeth Perez?

PINIDUT ni Bernard ti sigariliona iti pagyarsangan ket nagsasaruno a sinusopna. Dandanin mapunno ti pagyarsangan iti rungrong. Kinitana ti oras iti pungupunguanna. Ala unan iti parbangon. Nasuroken a tallo nga oras ni Minerva a matmaturog.

Nagareng-eng ni Minerva. Madamdama, immulagatna dagiti matana. Bimmaringkuas idi makitana ni Bernard. Ginammatanna ti ules ket inyabbongna iti barukongna.

“Ania ti inaramidmo kaniak?” nagtigerger ti timekna.

“Awan ti pagdanagam,” insungbat ni Bernard. “Awan ti napasamak kenka. Saan a napingasan ti kinabirhenmo.”

“Inallilawnak,” nakuna ti balasang. “Pinagsinnukatmo dagiti baso.”

“No dika nasiputan, nalabit sinimotmo amin a naguneg ti petakak,” imbales ni Bernard.

Nagtugaw ni Bernard iti pingir ti katre ket ginammatanna ti abaga ni Minerva. Naganninaw ti buteng iti mata ti babai.

“Maikamanoakon a linokom?” indagdagsen ni Bernard ti timekna.

“S-sika ti umuna.”

“Dimo kadi naamiris a maikaniwas iti linteg ti aramidmo?”

“Ammok. Ngem awan mabalinko. Kasapulak ti kuarta.”

“Pakasapulam?”

“Para ken ni Jefferson. Adda iti ospital. Grabe ti sugatna. Dakkel a kantidad ti mabusbos iti operasionna.”

“Ti kunam, mamatiak iti palabasmo?”

“Awan mabalinko no dinak patien.”

Inibbatan ni Bernard ni Minerva. Minatmatanna iti napaut. Nakipinnerreng ti balasang.

Naapiras ni Bernard ti timidna. Agsasao ngata iti pudno?

Naammuanna a lima a tawenen nga agnobio da Minerva ken ni Jefferson Anicas. Agpapaay ni Jefferson a security guard iti maysa a pabrika ti sapatos. Rabii ti panagbantayna. Agadal iti aldaw. Addan iti maudi a tukad ti komersio.

Idi naminsan a rabii, nagbuya da Minerva ken Jefferson iti sine. Pasado alas dies idi rummuarda iti pagsinean.

Agur-urayda iti luganda idi kellaat a ginammatan ti maysa a lalaki ti bag ni Minerva. Kinamat ni Jefferson ti agsisipdut. Idi makamakamna, naggubalda.

Inasut ti mannanakaw ti balisongna ket binagsolna ni Jefferson.

Intaray ni Minerva ni Jefferson iti MMC. Natakuatan dagiti doktor a napadamgisan ti dalemna. Kasapulan ti operasion.

Adda bassit urnong ni Minerva ngem agkurang. Inasitganna dagiti gagayyemna ngem awan ti nautangna.

“Napanunotko daytoy a pamuspusan tapno mapataudko ti kuarta a kasapulan ni Jefferson,” naburak ti timek ni Minerva. “Ammok a dakkel a basol iti imatang ti Dios ken iti linteg ngem ay-ayatek ni Jefferson. Aramidek amin a kabaelak, agbiag la ketdi. Uray pay isu ti pakapingasan ti dayawko.”

Nagari ti ulimek. Minedmedan ni Minerva ti saibbekna.

Pinidut ni Bernard ti auditibo. Inawaganna ti ospital.

“Hello, MMC daytoy,” timek-babai ti simmungbat. “Ania kadi ti maipaayko kadakayo?”

“Adda kadi pasienteyo nga agnagan iti Jefferson Anicas?” sinaludsod ni Bernard.

“Adda, sir. Kinapudnona, kalkalpas ti operasionna.”

“Kasano ti kasasaadna?”

“Nasayaat met, sir. No saan nga agbaliw ti kasasaadna iti agpatnag, dakkel ti namnama a makalasat.”

“Ammoyo kadi ti nagan ti babai a nangitulod kenkuana?”

“Wen, sir. Minerva del Mar. Nobia ti pasiente.”

Nagyaman ni Bernard ket indissona ti telepono.

“Agsukatkan,” nakunana.

“P-pangipanam kaniak?”

“Itulodka iti ospital.”

“Dinak ipulong iti polis?”

“Saan.”

“Apay?”

“Napaneknekak nga agsasaoka iti pudno.”

Simrek ni Minerva iti banio. Nakasukaten idi rummuar.

“Dimo koman uliten ti inaramidmo,” nakuna ni Bernard, sakbay a rimmuarda iti kuarto. “Mairuboka laeng.”

“Diak maikari dayta,” insungbat ni Minerva. “Kasapulak ti kuarta.”

Kinaut ni Bernard ti petakana. Inuksotna ti naguneg. Nangbilang iti dies mil. Impapetpetna ken ni Minerva.

“Inayonmo daytoy a busbosem iti ospital,” nakunana.

“Dakkel a kantidad daytoy,” insungbat ni Minerva. “Diak maipanamnama a mabayadak iti mabiit.”

“Saanko nga ipautang dayta.”

“Ania ti sukatna?”

“Awan. Itedko a kas tulong… iti pannakaam-ammok kenka. Agyamanak ta nasarakanka.”

“Dika maawatan.”

“Gastuek koma dayta a kuarta iti panangrambakmi iti nobiak iti panagkasangayko,” nakuna ni Bernard. “Ngem awanen ti nakaisangratanna. Nakitaray iti nasinged a pagayamko. Kapamitlon a naliputannak. Dayta ti gapuna nga inlunodko dagiti babbai. Namatiak a mangliliput amin a babbai. Ngem dimtengka ket naamirisko a nagbiddutak gayam. Napaneknekak nga adda pay met la gayam babai a kas kenka a sidadaan a mangisalda iti dayawna gapu iti ipatpategna.”

Kalpasan ti panangbayad ni Bernard iti panaggianda iti motel, rimmuardan iti inaladan ti pasdek. Pinarana ti sumungad a taksi.

“Ikarkararagko ti nadaras a yiimbag ni Jefferson,” pinisel ni Bernard ti dakulap ni Minerva.

“Dikanto malipatan iti unos ti biagko,” nakuna ni Minerva. Sakbay a limmugan, maysa nga agek ti immalditna iti pingping ni Bernard.

Pinagandar ti tsuper ti taksi. Insursurot ni Bernard ti panagkitana iti likudan ti taksi agingga iti inalun-on dagiti natatayag a pasdek. Immanges iti nauneg idi umaplaw ti salemsem. Nalag-an ti riknana. Ammona nga iti masakbayan, makasarakto met iti kas ken ni Minerva del Mar, alias Maribeth Perez.#