Minibus, nakaruskos iti sang-atan, 10 pasahero nadunor

STA. MARIA, Ilocos Sur – Sangapulo a pasahero ti nadunor gapu iti pannakakaruskos ti minibus a naglugananda nga agpababa idi saan a makasang-at iti kurbaan sadiay Barangay Baballasioan, ditoy nga ili idi aldaw ti Enero 17.

Naitaray iti Central Ilocos Sur District Hospital, Brgy. Paratong, Narvacan, Ilocos Sur, para iti pannakaagas ti dunorda dagiti pasahero a pakaibilangan da Florentina Mejia, 72, balo; Regine Torio Fernandez, 14; Divina Jimenez Tendenilla, 49; Don-don Nacar, 32; Delia Jimenez Bautista, 50; Cristina Mejia Areola, 45; Kristie Mejia Clores, 6; Jocelyn Mejia, 25; ken Cheshna Mejia Areola, 45, residenteda amin iti Dagupan City idinto a naipan iti Reyes Clinic and Hospital ni Amelia Novelos Fernandez, 45, married, negosiante ken residente iti Pantal, Dagupan City, Pangasinan gapu iti sinagrapna a sugat iti ulona.

Segun iti report, saan a nakasang-at ti Queen Terry Minibus a minaneho ni Tirso Cruz y Serapio, 41, residente iti 291 Malabago, Mangaldan, Pangasinan, iti pagkurbaan a paset ti kalsada a sakup ti Barangay Baballasioan ket nakaruskos ken naisaltek iti kalsada a puon ti nakasugatan dagiti 10 a pasahero.

Agdagup amin iti 41 dagiti pasahero ti minibus.#