NARVACAN, Ilocos Sur – Nasugatan ti konduktor ken drayber ti maysa a minibus kalpasan a natupakan ti luganda iti dakkel a kayo ti narra kabayatan iti panagpatarayda iti national highway, barangay Santa Lucia, ditoy.

Nabigbig dagiti nasugatan a da Eduardo Pipo, 26, agnaed iti Zone 1, Bantay, Ilocos Sur, drayber, ken ni Anthony Gazmen, 28, agnaed met iti Puspos, Bantay, Ilocos Sur, ken konduktor ti minibus a Honolulu Twister, addaan iti plaka No. AVZ-634.

Iti inisial nga imbestigasion dagiti pannakabagi ti linteg ti Narvacan, agtartaray nga agpabagatan ti lugan idi kellaat a nagtuang ti dakkel a pinuon ti narra iti dalan.

Pinadas ti drayber a liklikan ti panakaidungparna iti kayo, ngem maigapu iti kinagalis ti kalsada iti dayta a gundaway, naaksidenteda.
Nasugatan ti drayber ken konduktor ken nakaro ti pannakadadael ti lugan.

Nupay, kasta, saan met a naan-ano dagiti pasahero.

Mapapati a limmukay ti daga a kimpetan dagiti ramut ti narra gapu iti nagsasaruno a bayakabak.