Minibus, van, traysikel, nainbolbar iti pannungpar

CABUGAO, Ilocos Sur – Maysa a minibus, van ken traysikel ti nainbolbar iti aksidente a napasamak itay nabiit iti sanguanan ti Shell Gasoline Station iti Barangay Rizal, ditoy nga ili a nakadadaelan dagiti lugan ken nakadunoran ti maysa a pasahero.

Segun iti inbestigasion, naggapu iti makanawan a shoulder ti kalsada nasional ti van a minaneho ni Paulino Mendoza, 60, retired seaman, residente iti Magat St., Laoag City ket agpakannigid koma ngem dinungpar ti lumabas a JMC Liner a minaneho ni Rene Tuguib, 44, residente iti Cuancabal ditoy.

Mapapati nga awan ti flash ken signal light ti van isu a di nakita ti drayber ti minibus.

Gapu iti pigsa ti pannungpar, dinungpar ti van ti maysa a nakasardeng a traysikel a nakadunoran ti kanawan a luppo  ni Elenelyn Baclig, 14, pasahero iti traysikel.

Nakaro ti dadael dagiti tallo a lugan.#