Misa de Gallo, Saan a Simbarkada

Dimteng manen ti panawen a segseggaantayo, ti misa de gallo wenno misa iti parbangon a nangrugi idi Disiembre 16. Saantayo a sawiren ti kumutukot a lam-ek ken pannakatunday ti imas ti turogtayo bayat a nakakumot tapno laeng  ipaduyakyaktayo ti panagrukbabtayo iti Mesias  Nasken nga aramidentayo daytoy tapno lalo pay a rumukbos ti ebanghelisasion para iti panangisaganatayo iti bagitayo iti pananglagiptayo manen iti pannakaipasngay ti Mannubbot. Naganaygay pay ken inspiradoka no sika ti agbertdey, anianto la ketdin iti Mannakabalin? Siam laeng a parbangon nga aramiden daytoy maminsan laeng iti makatawen, ditayo ketdin maaramid?

Daytoy koma iti nakaisentroan iti amin— ipangruna ti kaipapanan ti misa iti parbangon,  saan ket nga aramiden ti misa de gallo wenno simbang gabi a kas simbarkads wenno simbarkada—panagkikita, panagsasarak dagiti dabarkads para iti panangitaguyod iti bukod nga interes, essem ken pagsayaatan, para iti ibubussog ti bituka ti bukodda nga ego ken preperensia, dagiti gimik ken paistariray iti gimong, lalona kadagiti agtutubo kadagitoy a panawen.

Ken wen, saan koma nga aramiden ti misa de gallo a papogi points dagiti adda sabsabongenna wenno dagiti addaan iti nalimed nga apple of the eyes a kas impression technique.Umanayen dagiti intension a kas bugas ti pammati, kas ti pannakagun-od iti ar-arapaapen iti biag no malpasmo dayta siam a parbangon a pannakimisa. Obligasionmo met kas natudio iti pammati, a di ket a mamitloka laeng a sumrek iti simbaan bayat ti panagbiagmo iti rabaw ti daga: umuna, iti aldaw a panagbuniagmo; maikadua, iti aldaw ti kallaysam; ken maudi, iti aldaw ti pannakaitabonmo.

Liklikan koma dagiti aramid a mangilaksid ti asinoman iti napudpudno a kaipapanan no apay nga atenderan ti misa de gallo wenno simbang gabi. Ipapuso ketdi dagiti tagipatgen itoy tapno mas lalo pay nga agrimat ti kinatao iti imatang ti Dios. Ti misa de gallo ket panangselebrar iti Eukaristia iti siam a parbangon a kas panagsagana iti pananglagip manen iti pannakaipasngay ti Mannubbot.

Nauneg a pammati ti nagramutan ti misa de gallo,  selebrasion a nangrugi idi 1587, babaen ti konsepto ni Fray Diego de Soria. Iti pagiliantayo, mismo a ni Pope Sixtus V ti nangipaulog iti dekreto wenno pammilin a mapasamak met ti misa iti parbangon para kadagiti magabay ken pitsido ti orasna gapu iti trabaho ken bukod a pakasikoran a sumuknal iti simbaan iti siam a parbangon para iti panangisagana ti ispiritual a bagi wenno panawen iti panagulimek ken panagpanunot, pananglagip iti pannakaipasngay ti Mannubot sadiay nanumo unay a kulluong.

No intay aramiden ti maitutop itoy nga okasion, nakananama met ti maragpat a grasia a dumteng, a kas supapak ti kinatudiotayo ken kas napudpudno a Kristiano, ken kangrunaan iti amin, saan a pannakaiyadayo iti sidong ti Anak ti Tao.Ti misa de gallo ket panangisagana ti bagi ken kararua, iti kinatao para iti masungad a paskua.#