SALCEDO, Ilocos Sur – Imon ti mapapati a gapu ti nangbagbagsolan ti maysa a misis ti kalugaranna a babai.
Iti report manipud iti polis ditoy, binagsol ni Vidaline Gomintong y Agbao, 31, naasawaan, residente iti Barangay Kaliwakiw ditoy nga ili, ti kalugaranna a ni Paterna Lacadena y Peralta, 32, laborer, a puon ti nakayospitalan ti naud-udi.
Naammuan iti inbestigasion a napan gimmatang ti biktima iti gatas iti maysa a tienda iti lugarda ket idi aggawiden, sinurot ti suspek ket pinagsasawanna iti “Hoy, puta” a bimmalesan met ti biktima a nagsao iti kapadpadna a balikas.
Mapapati a ginammatan ti suspek ti biktima sana binagbagsol iti sumagmamano a daras.
Naitaray ti biktima iti Salcedo Medicare Community Hospital tapno maagasan dagiti sugatna.
Agatiddog iti walo a pulgada ti aglatlati nga imuko a naala dagiti polis iti suspek.
Mapapati nga agim-imon ti suspek iti biktima.#
