MMSU-Batac, Top 10 performing school: PRC

BAGUIO CITY – Impakaammo ti Professional Regulation Commission (PRC) nga agdagup iti 15,292 manipud iti 26,690 a nageksamen ti nakapasa iti Nurses Licensure Examination a naangay iti nadumaduma a testing centers iti sapasap a pagilian idi Nobiembre 2014.

Segun iti Baguio Regional Office, iti Baguio City, agdagup iti 1,186 manipud iti 2,286 examinees (52%) ti nakapasa iti eksamen. Iti Dagupan, 415 manipud iti 842 (49%) ti nakapasa idinto nga iti Cabanatuan, 251 manipud iti 655 (38%) nga examinees ti nakapasa. Iti Laoag, 453 manipud iti 666 (68%) a nageksamen ti nakapasa.

Nairaman ti Mariano Marcos State University-Batac iti Top 10 performing schools kas maibatay iti Commission Resolution No. 2010-547 series of 2010 babaen ti 50 wenno ad-adu pay a nageksamen a nakagun-od iti saan a nakurkurang ngem 80% passing percentage.

Nagun-od pay ti MMSU-Batac ti maikanem a ranggo, babaen ti pannakapasa ti 114 manipud iti 120 nga examinees wenno 95% passing percentage.

Uppat pay nga examinees manipud iti nasao a pagadalan ti karaman iti Top 10 a pakaibilangan da Ralf Jay Villanueva Retotal (86.60-2), Christelle Tangonan Garcia (85.40-7), Marianne Angelina Ramos Lorenzo ken Allanah Mae Bangloy Sudario ( 84.80-10).#