MOA iti tobacco contract growing program, inaprobaran ti SB San Juan

SAN JUAN, Ilocos Sur – Inaprobaran ti sangguniang bayan ti iseserrek ti lokal a gobierno ditoy iti katulagan iti maysa a tobacco firm para iti pannakaipatungpal ti contract growing program iti masungad a panagtatabako.

Inaprobaran ti SB ti pannakitulag ti lokal a gobierno ditoy babaen iti maysa a memorandum para iti pannakaipaay ti pinansial a tulong kadagiti agmulmula iti tabako ditoy nga ili babaen ti counterparting program ti LGU nga idadauluan ni Mayor Benjamin Sarmiento ken ti TransManila Inc., maysa a trading center.

Babaen ti counterparting program, mangilatang ti LGU ken ti nasao a tobacco trading firm iti sag-P5,750,000,00 a maipautang kadagiti agmulmula iti tabako iti masungad a tobacco season. Aggapu ti counterpart ti LGU San Juan manipud iti pondo ti RA 7171.

Nasurok a 800 a mannalon ti tabako a sumrek iti contract growing ti mapautangan iti pagpuonanda iti masungad a panagtatabako.#