Mobile Outreach Services, inangay ti PRC iti Cabugao

CABUGAO, Ilocos Sur – Inangay ti Professional Regulations Commission (PRC) ti “Araw ng Propesyonal” (Mobile Outreach Services) ditoy nga ili itay Mayo 28 tapno mismo nga idanonna ti serbisiona kadagiti propesional iti probinsia ti Ilocos Sur.

Kangrunaan a panggep daytoy mobile outreach services ti pannakaidanon kadagiti propesional ti serbisio ti PRC kas iti pannakapabaro ti lisensiada, panagaplikarda iti eksamen, pannaka-authenticate dagiti dokumentoda iti PRC ken pannakapasingked no nakaruarda iti eksaminasion.

Timmulong dagiti personnel ti Office of the Mayor, kasta met ti staff ti HRMO nga idadauluan ni HRMO Teresita S. Sison kadagiti taga-PRC para iti naannayas a pannakaiwayat ti mobile outreach services.

Daytoy ti maikatlo a gundaway a naangay ti outreach services ti PRC iti intero nga Ilocos Region ditoy nga ili.

Kanaig daytoy, sumaruno a maangay ti mobile outreach services iti Laoag City ken Dagupan City (June 1); Cabanatuan City (June 5); San Fernando Pampanga, Dole Regional Office III (June 8); Tarlac City , Sta. Cruz, Zambales, (With Job Fair) ken Candon City (With Job Fair) (June 12); Dagupan City, Pangasinan (With Job Fair, June 16); Rosales, Pangasinan ken Lagawe, Ifugao (June 18-19).

Kabayatanna, rinuk-atan ti PRC ken ti Board of Professional Teachers ti resulta ti Licensure Examination for Teachers (LET) a naangay iti Singapore ken 17 a testing centers iti sapasap a pagilian idi Marso 29 daytoy a tawenn.

Segun iti PRC ken BPT, iti sapasap a pagilian, 12,103 elementary teachers manipud iti 44,144 a nageksamen (27.42%) ken 17,904 secondary teachers manipud iti 56,596 examinees (31.63%) ti pimmasa iti LET.

Saan a naruk-atan ti resulta ti eksamen ti 11 examinees kabayatan a pinal a maikeddeng ti liabilidadda iti babaen ti paglintegan ken regulasion a kas intuding ti licensure examination. Kas sagudayen ti PRC Resolution No. 2004-223 a napetsaan Hulio 19, 2004, pinal ti resulta dagiti eksaminasion ket saan a maipalubos ti kiddaw para iti rekonsiderasion dagiti failing grades.

Naammuan nga iti Baguio, 1,001 elementary teachers manipud iti 2,977 (33.62%) ken 1,754 secondary teachers manipud iti 5,035 (34.84%) examinees ti nakapasa iti eksamen.

Segun pay iti PRC, karaman ti Saint Louis University kadagiti top performing schools kas maibatay iti Commission Resolution No. 2010-547 series of 2010 agsipud ta 20 wenno nasursurok nga examinees ti addaan iti saan a nakurkurang ngem 80% passing percentage iti elementary level.#