Mobile passporting, maisayangkat

VIGAN CITY – Impakaammo ti opisina ni Cong. Ryan Luis Singson a maangay ti maysa a mobile passporting para kadagiti agindeg iti umuna a distrito ti Ilocos Sur manipud alas-8 agingga iti alas-5 iti malem inton Mayo 31.

Kinuna ni Singson a maangay daytoy a serbisio iti Function B ken C ti Baluarte Vigan City babaen ti pannakitinnulong ti Department of Foreign Affairs.

Para kadagiti interesado nga agaplikar masapul nga isaganada ti kopia ti birth certificate a naggapu iti National Statistics Office ken dua a valid I.D. No menor de edad ti aplikante, masapul a kuyogen ida dagiti nagannakda.

Kadagiti babbai nga addaan iti asawa, mangitugotda iti kopia ti marriage certificate idinto a kadagiti nakapukaw iti passport, mangitugotda iti affidavit of koss ken kopia ti police report kas pammaneknek a napukaw daytoy.

Gapu ta 700 laeng ti naited a quota para iti daytoy a panagpasaporte, mismon a ti staff ni Cong. Singson ti mapan  mangala kadagiti requirements a masapul manipud kadagiti aplikante kadagiti nadumaduma nga ili iti umuna a distrito ti Ilocos Sur para iti pannakaberipikada sakbay ti passporting inton Mayo 31.

Adtoy ti schedule:

Abril 30 – 8am-12nn, Sta. Catalina ken 1 pm-5 pm, San Vicente;

Mayo 2 – 8 am – 12 nn,  Bantay  ken 1 pm – 5 pm, Caoayan;

Mayo 3 – 8 am – 12 nn, San Ildefonso ken 1 pm – 5 pm,  Sto. Domingo;

Mayo 4 – 8 am – 12 nn,  Magsingal ken 1 pm – 5 pm, San Juan;

Mayo 5 – 8 am – 12 nn,  Cabugao ken 1 pm – 5 pm,  Sinait

Mabalin ti mangala iti application form iti Vigan Plaza Hotel front desk wenno iti Ancestral House iti Quirino Blvd., Vigan City. Para iti ad-adu pay nga impormasion, tumawag wenno agtext kada Ryan Astom iti 09063333600/Jing Mamon iti  09163946646.#