Modelo, movie stars a nakaaruat iti pagdigos maiparit a maretratoda iti Heritage Village

VIGAN CITY – Kalpasan ti naunday a pannakaadalna, inaprobaran ti sangguniang panlalawigan iti maikadua a pannakaibasana ti ordinansa a mangipawil iti panagretrato kadagiti modelo wenno artista  a nakaaruat iti pagdigos iti Heritage Village ditoy.

Daytoy ti bugas ti ordinansa a pinutar ni Gov. Deogracias Victor “DV” Savellano tapno masaluadan ti napintas nga imahe ti Vigan Heritage Village a maysa kadagiti kangrunaan a tourist destination iti Amianan a Luzon.

Naidatag ti nasao nga ordinansa idi bise gobernador pay laeng ni Savellano ket naipaima iti committee on rules nga idadauluan ni Provincial Board Member Orlino Tesoro para iti pannakaadalna.

Sagudayen pay ti nasao nga ordinansa a maiparit panag-shooting iti Vigan Heritage Village, iti simbaan iti Sta. Maria ken dadduma pay a balay-pagkararagan kadagiti eksena a nakaaruat dagiti modelo wenno movie personalities iti swimsuit wenno skimpy clothes.

Karaman ti simbaan ti Sta. Maria kadagiti heritage sites iti sangalubongan.

Indatag ni Savellano ti nasao nga ordinansa gapu ta adda napasamak a panagparetrato dagiti modelo a babbai a nakaaruat iti swimsuit ken skimpy attire iti Heritage Village.

“Saan a maikanatad a pagretratuan dagiti nakaaruat iti pagdigos ken skimpy attire ti maysa a heritage site a kas iti Vigan Heritage Village,” kinuna ni Savellano.

Sagudayen ti ordinansa a mapatawan iti pannusa dagiti aglabsing.

Kinuna pay ti gobernador a dina kontraen ti panagparetrato dagiti modelo a nakaaruat iti pagdigos ngem iti umno a lugar a kas kadagiti beaches.

Maysa ti Vigan Heritage Village kadagiti nailista iti Unesco a tawid ti sangalubongan gapu kadagiti daan a pagtaengan ditoy a naipatakder pay la idi tiempo dagiti Kastila.

Kas heritage site, saluadan ken salakniban daytoy ti internasional a komunidad uray iti tiempo ti gubat.

Manamnama ti pannakaaprobar ti ordinansa iti third reading iti sumaruno a panagsession dagiti provincial board members.#