Modernisasion ti AFP kasapulan

Sakbay ti Semana Santa, nagsasaruno dagiti improvised a bomba a naduktalan dagiti kameng ti Philippine National Police iti siam a nadumaduma a lugar iti Metro Manila ken iti Cotabato City ken Davao City.

Gapu kadagitoy naduktalan nga improvised bombs, rimsua ti panagamak dagiti umili nga adda manen dagiti maisayangkat a panagpabettak iti bomba iti Metro Manila.

Saan pay a naglunit ti sugat a pinarnuay ti pannakapabettak ti bomba iti LRT itay napan a tawen a nakatayan ti 12 a tattao a pakairamanan ti dua a menor de edad ken nakasugatan ti 19 a pakairamanan ti walo a menor de edad.

Nupay kuna dagiti polis a nabigbigdan dagiti kameng ti maysa mapagduaduaan a grupo nga agkunkuna nga adda iti likudan iti pammutbuteng iti bomba, awan pay ti inarestoda.

Maysa a grupo, ti Indigenous People’s Federal Army (Ipfa) ti limtuad nga akinresponsable iti pannakaimula dagiti bomba kadagiti lugar a publiko iti metro Manila ngem kuna met ti polis a berberipikaranda pay no pudno nga adda a biag dagiti agkunkuna nga adda iti likudan daytoy a grupo.

Saan met nga inlaksid dagiti opisial ti intelehensia nga adda pakainaigan ti Moro Islamic Liberation Front (MILF), Moro National Liberation Front (MNLF) ken dagiti puersa a napudno ken napadisi a Presidente Joseph Estrada kadagiti bomb threats.

Segun dagitoy nga opisial, adda rason dagitoy a grupo a mangriribuk iti gobierno agsipud ta agdama a nakabalud dagiti idoloda (Misuari ken Estrada) gapu ta sumangsangoda iti kaso a kriminal iti korte.

Sumangsango ni Misuari iti kaso a rebelion idinto a plunder ken ni Estrada. Saan a malibak nga adda pay la dagiti grupo a “napakapsutandan a puersa.”

(Idi Enero 23, 2009, kalpasan iti panagusig a nagpaut iti aganay lima a tawen, kinonbiktar ti family court babaen ken ni Judge Cielito Mindaro-Grulla ti Branch 29 ti Manila Regional Trial Court a nakabasol iti multiple murder, multiple frustrated muder ken multiple attempted murder da Moklis Hadji Yunos, Abdul Fatak Paute ken Mamasao Naga gapu iti  panangplano ken panangiwayatda iti panagbomba iti Light Rail Transit (LRT) idi Disiembre 20, 2000 ket sinentensiaanna ida iti reclusion perpetua wenno pannakaibalud manipud 20 agingga iti 40 a tawen nga awan ti posibilidad iti pannakaparol.

Ni Yunos ti mapapati a dadaulo ti grupo, kas eksperto ti eksplosibo ken nangannugot a kameng ti Moro Islamic Liberation Front (MILF).

Pito pay a sabsabali a suspek iti nasao a panagbomba  a nainaganan Isamuddin Riduan (a.k.a. Hambali), Efren Torres, Sammy Arinday, Alim Pangalian Solaiman, Abubakar Bafana Faiz, Salman Moro ken Ustad Said  ti mabirbirok idi maiyetnag ti sentensia dagiti tallo.

Maysa kadagiti suspek, ni Fathur Rohman Al-Ghozi, ti nakalibas iti nakadeteneranna ngem napapatay iti maysa nga engkuentro. – Editor)

Imbilin pay ti korte ti panagbayad tunggal maysa kadagiti nakonbiktar iti P125,000 kadagiti agtawid kadagiti 12 a natay iti panagbomba ken P100,000 kadagiti nasugatan.

Kuna dagiti sumagmamano a kritiko ti turay a nairanta dagiti bomba a saan a mapabettak, no di panangipakita nga awanan iti kapabilidad ken ramit ti PNP a manglapped iti terorismo iti pagilian.

Nupay addaan dagitoy a bomba iti amunision, electrical wiring ken timing device, saanda a nairanta a mapabettak.

Maysa pay a natakuatan dagiti polis iti uneg dagiti bomba ti asul a pulbos.

Ita, kiniddaw ti PNP ti tulong ti Federal Bureau of Investigation tapno maammuanda no ania a banag ti nasao a pulbos.

“Nakiddaw iti FBI a mangamiris no ania a kita ti substance (ti asul a pulbos) idinto a taktakuaten met ti bukodtayo a FED (Firearms and Explosives Division),” kinuna ni Senior Supt. Leonardo Espina, parasao ti PNP.

Kas ninamnama, kinuna ni Espina a kayatda laeng a siguraduen a mabigbig a husto (ti asul a pulbos).

Inkalintegan pay ni Espina nga addaan iti katulagan ti PNP ken FBI nga agkammayyet inkaso nga adda lumtuad a tiempo a kasapulan ti pannakaberipika ti maysa a banag.

Impeksa met ni Deputy Director General Rex Piad, chief of the directorial staff, a “no addan iti ruar ti kapabilidad ti laboratoriotayo ti krimen, birokentayo ti tulong manipud sabali nga ahensia tapno maammuantayo no ania dayta a banag.”

Iti nalawlawag a pannao, kayat a pagparangen ti PNP nga ordinario laeng a banag ti panagkiddawna iti tulong manipud iti FBI.

Ngata?

Iti maysa nga ordinario nga umili, nangruna kadatayo a nairuam a bukodnan sanotannan, simple ti kaipapanan ti panagpatulong ti maysa a tao iti sabali a tao, wenno iti daytoy a gundaway, ti maysa a buro wenno ahensia iti sabali a buro: saantayo a kabaelan a risuten ti problema iti bukodtayo a kabaelan.

Wenno adu ti ekspertotayo ngem awanantayo iti naan-anay a ramit iti Metro Manila. No ar-arigen simple laeng ti pannakaaramidda. Namak payen no kumplikado ken addaan kadagiti mekanismo a mangiwaras kadagiti pagbutbutngan a sakit ken bakteria?

Nasaysayaat nga amang nga akuen ti PNP a kasapulan a mapamoderno dagiti ramit ken armasna, ken laboratoriona a maiagpang iti nadur-asen a teknolohia iti sangalubongan tapno maannongna dagiti pagrebbenganna kas salaknib dagiti umili kadagiti terorista.#