Modus operandi daytoy mannanakaw: agpammarang a customer ngem agsipsiput iti biktimaenna

STO. DOMINGO, Ilocos Sur – Modus operandi daytoy a mannikuat ti sumrek iti pagtagilakuan sa agpammarang a kustomer ngem agsipsiput iti mabalinna a sikuaten iti kanito a makaliway ti biktimaenna.

Ngem iti daytoy a gundaway, saan a nagballigi ni Michael Pipo y Evangelista, 36, naasawaan, awanan panggedan, ken residente iti Zone 1, Bantay, Ilocos Sur agsipud ta natukmaan dagiti otoridad ket naiyendorso payen ti kasona a panagtakaw iti opisina ti provincial prosecutor, Vigan City, Ilocos Sur.

Idi agarup 11:40 ti aldaw ti Nobiembre 24, simrek ni Pipo iti Majorijay Variety Store a kukua ni Ricardita Tubon y Pilorin, 68, naasawaan, ken residente iti Barangay Napo, Magsingal, Ilocos Sur ket nagpammarang nga adda gatangenna.

Iti dayta met a kanito, agbilbilang ni Tubon iti naglakuanna ngem sumagmamano a sag-P100.00 ti timmayab gapu iti napigsa nga angin nga impugso ti agtaytayyek a bentilador ket timmakder ti negosiante tapno pidutenna dagiti kuarta.
Ginundawayan ni Pipo ti pannakaliway ti baket ket dinagdagusna a pinidut dagiti 12 a sag-P500.00 a naikabil iti nakalukat a drawer iti counter.

Ngem sakbay a nakalibas ti suspek ket natukmaan dagiti otoridad.

Iti sabali a bangir, dakkel a leksion iti maysa a maestro ti panangibatina iti pouch ken petakana iti compartment ti motorsiklona sa napan nagehersisio iti plasa ti siudad ti Vigan.

Gapu iti daytoy a panagliwayna, natakaw ti pouch ken petaka ni Solito Suyat Cortel, 45, naasawaan, maestro, ken residente iti Barangay Pantay Daya a nakaikabilan dagiti sumagmamano a napateg a card ken dakkel a kantidad ti kuartana.

Iti report ni Suyat iti polis, kinunana nga imbatina ti pouch ken petakana iti compartment ti motorsiklona nga imparkingna iti laud a paset ti Plaza Salcedo ditoy siudad idi agarup 5:45 ti bigat ti Nobiembre 27, 2014 sa napan nagdiaging.

Idi nagsubli ni Suyat, awanen ti wallet ken pouch a naglaon dagiti nadumaduma nga ATM cards, driver’s license, PRC ID, UMID card, PhilHealth card ken kuartana nga agdagup iti nasurok P5,000.00.

Segun iti biktima, nadadael ti kalub ti compartment ti motorsiklona.

Saan pay a nabigbig no asino ti nangsikuat iti wallet ken pouch ti maestro.#