Morales: saan a tallikudan ti gobierno probinsial ti utangna

VIGAN CITY – Kinuna ni dati a Bokal Ann Europa-Morales a saan a tallikudan ti gobierno probinsial ti utangna mainaig kadagiti iskolar a pagad-adalenna idinto nga indagadagna ti panagpatang dagiti dua nga ehekutibo tapno masolbar ti nasao a problema.

Kinuna ti dati a bokala nga adda P6,156,536.35 nga utang ti gobierno probinsial iti UNP idi Pebrero daytoy a tawen, ngem idi Abril, binayadanda ti P563,040.00 para iti 1st semester ti 2007-2008 ken naisaganan ti voucher a maproseso para iti 2nd semester ti 2007-2008.

Iti panagparang ni Dr. Gilbert Arce iti sangguniang panlalawigan idi Abril 30, impakaammona a nangaramid ti scholarship committee ti UNP iti resolusion a mangirekomenda iti pannakasuspenso ti provincial scholarship program agingga iti saan a mabayadan daytoy ti utangna iti unibersidad.

Ngem kinuna ni Morales bayat ti interbio kenkuana ni Jun Ramos iti programa daytoy a Barangay Commando Brigada nga adda patangan da Gov. Deogracias Victor Savellano ken ni UNP Pres. Lauro Tacbas mainaig iti pannakapasayaat ti gymnasium ti nasao a pagadalan isu a dida ginargaraw ti nailatang para iti programa nga aganay P5 milion ngem “along the way, adda misunderstanding” ket daytanto ti pagpapatangan ti UNP ken ti provincial government.

“…Napimpintasto laengen a dagiti dua nga executive ti agpatang tapno nalawlawag, naal-alanas ti pannakaurnos daytoy a banag…” kinuna ni Morales idinto a linagidawna no apay nga iti sangguniang panlalawigan ti pagsingiran ti UNP a saan ket nga iti opisina ti gobernador.

Innayon ni Morales nga uray saanto man nga awaten ti UNP dagiti provincial scholars,  agtultuloy latta daytoy a programa ti gobierno probinsial.

Kinuna ni Morales a sakbay a nag-exit (kas chair ti committee on education ti hunta probinsial), nagpapatanganda kada gobernador no kasano nga i-settle ti nasao nga utang.

“Saan met a taltallikudan ti provincial government and there are plans a talaga a mabayadantayo daytoy nga arrears ti provincial government iti UNP,” kinuna ni Morales.

Naammuan ken ni Morales a tallo a pagadalan ti partners ti provincial government mainaig iti programana iti scholarship a pakairamanan ti UNP Vigan ken Candon campuses, ti Ilocos Sur Polytechnic State College ken ti Ilocos Sur Community College.

Mainaig iti mapapati a saan a pannakaibiang ti committee on education iti hunta probinsial iti scholarship program, linawlawagan ni Morales nga agpanday iti linteg ti trabaho ti provincial board  ket ti ehekutibo ti mangiyemplementar kadagiti programa wenno aniaman nga aprobaran ti sangguniang panlalawigan.

Kinuna ni Morales a natrataren dayta nga issue iti opisina ti gobernador ken ti hunta probinsial ket awan met ti komentario ti provincial board idi inlawlawag ti gobernador dagiti programa iti babaen ti opisinana.

Kinunana a mangnamnama a silulukat ti UNP a makipatang idinto nga impatalgedna a nakasagana met ti provincial government para iti pannakaurnos ti problema tapno saan nga agsagaba dagiti iskolar ti probinsia.#