Most wanted person iti Ilocos Sur, naibaluden

CANDON CITY – Naikursongen iti pagbaludan ditoy siudad ti most wanted person iti Ilocos Sur babaen ti commitment order a pinirmaan ni Judge Maria Celestina Cabaguio-Acal ti MMTC Candon City.

Maipalagip nga inaresto dagiti nagtitipon nga operatiba ti Candon City police station ken 4ARCIDU ni Francisco Aliroso y Ramos, 40, tricycle driver, sadiay Barangay Bayog, Los Baños, Laguna idi malem ti Agosto 6 babaen ti bileg ti warrant of arrest nga inyisio ni Judge Policarpio P. Martinez ti 1st Judicial Region, RTC Branch 71, Candon City.

Sumangsango ni Aliroso iti uppat a nagsisina a kaso ti rape ket awan ti nairekomenda a piansana. Sabali laeng dagiti innem a nagsisina a kasona a panaglabsing iti RA 7610 ket nairekomenda nga agpiansa iti P80,000.00 tunggal kaso.

Nakalista ni Aliroso a most wanted person iti Ilocos Sur gapu kadagitoy nagsusukot a kasona.#