Motorist assistance stations, naipasdek

TAGUDIN, Ilocos Sur – Duapulo a motorist assistance stations ti naipasdek a  timmulong kadagiti nagbakasion iti probinsia idi Semana Santa, daytoy ti naammuan manipud iti Citizen’s Involvement and Services, Inc. (CIS).

Segun ken ni Dante Tacata, maysa kadagiti opisial ti CIS, naipasdek dagiti  motorist assistance stations  a nagserbi a katulongan dagiti motorista  iti panagdaliasatda iti national highway manipud Sinait agingga ditoy nga ili.

Kinunana a timmulong pay ti CIS iti panangipatuldo  kadagiti agdamag a turista iti direksion a turongenda bayat ti kaaddada iti Ilocos Sur.

Kinuna ni Gob. DV Savellano a maysa daytoy a wagas a panangipakita dagiti taga-Ilocos Sur iti kinamanagsangailida a mabalin a makatulong iti turismo itoy a kalgaw. (Mancielito S. Tacadena)