Motorista a dimmungpar iti trailer truck, pimmusay iti ospital

STA. MARIA, Ilocos Sur – Pimmusay iti ospital a nakaitarayanna ti maysa a motorista kalpasan a dimmungpar iti nakaparking a trailer truck sadiay Sitio Balangen, Barangay Suso, Sta. Maria, Ilocos Sur idi rabii ti Oktubre 26.

Segun iti polis, malaksid nga awan ti plate number ti Rusi Raider motorcycle a minaneho ni Leonido Babera, Jr. y Quilinderio, 43, naasawaan, ken residente iti Barangay Cappa-Cappa, San Esteban, Ilocos Sur, awan pay ti driver’s license daytoy ken awanan helmet.

Naammuan iti inisial a panagimbestiga dagiti polis a nakaparking iti amianan nga abaga ti kalsada, nakasango iti laud a direksion ti tractor head trailer truck, nakarehistro iti Ansaldo Logistic Incorporated iti Panican, Davao City, Davao del Sur ken imanmaneho ni Reynaldo Porcadilla y Reas, 64, naasawaan, residente iti San Jose, Tacloban City, Leyte idi dinungpar ti motorsiklo nga agdaldaliasat nga agpaabagatan.

Gapu iti pigsa ti impact, nagsagrap ni Babera iti grabe a sugat iti nadumaduma a paset ti bagina.

Intaray dagiti nagresponde a polis ni Babera iti Reyes Clinic and Hospital iti Sta. Maria, Ilocos Sur ngem pimmusay bayat ti panakaag-agasna.

Iti pannakaisurat daytoy, adda iti kustodia ti polis ni Porcadilla ken ti trailer truck para iti umisu a disposision.#