Footer

Motorista a dimmungpar iti traysikel, nakasuan

VIGAN CITY – Sumango iti kaso a reckless imprudence resulting to homicide ti maysa a motorista gapu iti pannakatay ti ubing a naglugan iti  dinungparna a traysikel idi Hulio 15.

Nakasuan ni Rodel Palaca, 24, residente iti Barangay Vacunero, Sto. Domingo, Ilocos Sur, iti reckless imprudence resulting to homicide gapu iti pannakatay ni Mark Anthony Amaro Atianzar, 12, ken residente iti Barangay San Jose, Vigan City.

Segun iti panagimbestiga dagiti polis, agturong dagiti agama a Mariano Pula Atianzar, 30, ken ti anakna a ni Mark Anthony, iti pakaangayan ti Bombo Medico tapno agpaparut ti ubing iti ngipenna idi dinungpar ni Palaca ti traysikel a naglugananda.

Gapu iti impact ti pannungpar, naburak ti sarming ti traysikel ket naitudok iti tengnged ti ubing.

Naitaray ti biktima iti Metro Vigan Cooperative Hospital ngem indeklara ti doktor a nangtaming kenkuana nga awanen ti biagna.#