STA. MARIA, Ilocos Sur – Agsusukot ti naglabsingan daytoy a motorista a dimmungpar iti concrete barrier ti kalsada sadiay Barangay Suso ditoy nga ili idi rabii ti Oktubre 2.
Segun iti report, malaksid nga awan ti plate number ti motorsiklo a minaneho ni Joshua Gonzales y Ramirez, 20, awan lisensiana nga agmaneho ken saan a nakaaruat iti helmet idi maaksidente.
Kinuna met ti doktor a nangtaming kadagiti sugatna, nakainom ni Gonzales idi napasamak ti aksidente
Agpaabagatan a direksion ti motorsiklo ni Gonzales idi agarup 9:50 ti rabii ti nadakamat a petsa ket idi nakadanon iti nadakamat a lugar, napukawna ti kontrolna iti manibela a puon ti naguyasan ti luganna iti makannigid a linia ti kalsada ken nangdungparanna iti concrete barrier.#