Motorista, dati a polis, nagudas iti nagsina a pammaltog

BANTAY, Ilocos Sur – Dua a pammaltog ti napasamak iti dua nga ili a nakatayan ti dua ken nakasugatan ti dua pay.

Iti report a dimmanon iti provincial police office ditoy, naisayangkat dagiti pammaltog iti Barangay Magsaysay Norte, Sta. Maria idi malem ti Abril 5 a nakagudasan ti maysa a motorista ken nakasugatan dagiti dua nga inluganna, ken idi aldaw ti Abril 1 iti Barangay Balidbid, Salcedo a nakaiwalangan ti maysa a dati a polis.

Nabigbig ti biktima iti pammapatay iti Sta. Maria a ni Generoso Tobias y Torralba, 44, naasawaan, residente iti Barangay Quinarayan, Narvacan, Ilocos Sur idinto a nainaganan ti naiwalang iti Sitio Arnap, Brgy. Balidbid, Salcedo a ni Naruradom Gironella y Francia, 56, naasawaan, dati a polis, agdama a naka-parole ken residente iti Brgy. Kaliwakiw, Salcedo.

Segun iti report ti polis-Sta. Maria, agpaamianan a direksion ti Honda TMX motorcycle a minaneho ni Tobias, ken nakiluganan da Maricel Domingo y Zapata, 33, separada, ken Gemmalyn Nicolas y Domingo, 13, agpada a residente iti Barangay Tangbao, San Isidro, Bangued, Abra ket bayat ti kaaddada iti rangtay a sakup ti Barangay Maynganay Norte, Sta. Maria, kellaat nga inabay dagiti suspek a nagkalubbon iti motorsiklo sa pinaltogan ti maysa ni Tobias iti sumagmamano a daras a dagus a nakatayan ti biktima.

Nagsagrap ni Domingo iti garumiad iti kanawan a luppona idinto a di naan-ano ni Nicolas.

Cal. 45 ti naaramat iti pammapatay kas maibatay iti lima a kapsula ken maysa a deformed slug a narekobre iti crime scene.

Di pay ammo ti motibo ti pammapatay.

Kabayatanna, nasarakan idi agarup 10:30 ti aldaw ti Abril 1 nga awanen ti biag ni Gironella iti abaga ti kalsada iti Sitio Arnap, Barangay Balidbid, Salcedo.

Nagsagrap ti biktima iti sugat iti kanawan a paset ti bagina a mapapati a gapuanan ti gauge 12.

Iti inisial nga inbestigasion, naudi a nakita ti biktima iti balay ti kaanakanna a ni Teodoro Cortez y Gironella, sakbay a napan nangayo iti kabakiran.

Segun pay iti report, iti alas 9 ti bigat iti dayta a petsa, nakangeg dagiti kabagian ti biktima iti putok ket idi apanda nagpalutpot, nakitada laengen ti biktima a nakadasay.

Di pay ammo ti motibo ti pammapatay.#