Motorista, dead on arrival iti ospital

CABUGAO, Ilocos Sur – Saanen a naidanon iti ospital ti biag ti maysa a motorista kalpasan a dinungparna ti maysa a heavy equipment iti makalkalsada a paset ti highway ti Barangay Cuancabal ditoy nga ili idi rabii ti Mayo 31.

Nupay dagus a naitaray iti Pira Clinic and Hospital ni Allen Pascua y Saldua, residente iti Batac City, Ilocos Norte, indeklara ti  a nangtaming kenkuana nga awanen ti biagna idi maidanon iti ospital.

Segun iti panagimbestiga ti polis, agpaabagatan ti Honda TMX 155 a minaneho ni Pascua, idi dinungparna ti road roller a  nakaparking iti construction site a puon ti nagsagrapanna iti dunor iti ulona. Mapapati nga awan ti helmet, lisensia wenno dokumento nga iggem ti biktima idi maaksidente.

Nakaro ti pannakadadael ti motorsiklo, nangruna iti sungona.

Nakarekobre dagiti polis iti bulsa ti biktima iti maysa a selpon ket pinakaammuandan ti maysa nga Elmer Espanol a kabagianna.