BANTAY, Ilocos Sur – Malaksid nga awan ti plaka ti luganna, awan ti helmet ti motorista idi napasamak ti aksidente iti national highway a sakup ti Barangay Guimod idi sardam ti Hunio 27.
Ti makadakes, awan pay ti lisensiana nga agmaneho ni Marvin Bugarin y Viloria, 22, awanan asawa, ken residente iti Barangay Paras, Sto. Domingo, Ilocos Sur idi dinungpar ti motorsiklona ti Toyota Innova a minaneho ni Deovino Medrano y Dela Rosa, 32, naasawaan, clerk iti University of Northern Philippines, ken residente iti 100 Calderon Street, Sto. Domingo, Ilocos Sur/
Naideklara ni Bugarin nga awanen ti biagna gapu kadagiti sinagrapna a dunor iti ulo ken paset ti bagina idi maidanon iti Northside Doctors Hospital kalpasan ti panagdinnungpar ti motorsiklo ken ti kotse.
Kas maibatay iti inbestigasion, agpaabagatan a direksion ti Toyota Innova a minaneho ni Medrano ket iti lugar a nakapasamakan ti aksidente, mapapati a kimmaut iti liniana ti Mio motorcycle a minaneho ni Bugarin.
Pinadas ni Medrano a lisian ti motorsiklo babaen ti panagmaniobrana iti kanawan ngem dinungpar latta ti motorsiklo ti makannigid a sungo ti Innova a nakaigapuan iti pannakadundunor ni Bugarin.
Nakaro ti dadael ti Mio motorcycle.#