Motorista, dimmungpar iti traktora, DOA iti ospital

SAN VICENTE, Ilocos Sur – Saanen  a naidanon ti biag ti maysa a motorista kalpasan ti panangdungpar ti luganna iti maysa a traktora sadiay Barangay Bayubay Norte, ditoy nga ili idi rabii ti Mayo 27.

DOA iti Metro Vigan Cooperative Hospital ni Juanito Ragasa y Ruatos, Jr., 26, single, ken residente iti nadakamat a barangay gapu iti sinagrapna a sugat iti ulo gapu iti pannakainbolbar ti Euro XI motorcycle a minanehona iti  aksidente.

Segun iti report, agpaamianan a direksion ni Ragasa a nakalugan iti motorsiklona ket saanna a nakita ti kuliglig (traktora) a nakaparking iti igid ti kalsada a puon ti nakadungparanna iti daytoy ken nakatayanna.

Nakaro ti dadael ti motorsiklo ni Ragasa.#