CANDON CITY – Saanen a naidanon ti biag ti maysa a motorista maigapu iti aksidente ti lugan a napasamak iti kalsada iti Barangay Darapidap ditoy siudad idi agarup 12:30 ti parbangon ti Hulio 9, 2014.
Nabigbig ti biktima a ni Lyndon Pascua y Alcid, 22, naasawaan, ken residente iti Barangay Bagani Campo, ditoy met laeng siudad.
Segun iti inbestigasion, agpadaya a direksion ti biktima a nakalugan iti nalabaga a Honda TMX a motorsiklona idi mapapati a dinungparna ti concrete plant box iti amianan nga abaga ti kalsada sa dinarusdos ti lugan ti maysa a kayo.
Naideklara ni Pascua a dead on arrival iti St. Martin de Porres a nakaitarayanna kalpasan ti aksidente gapu kadagiti sinagrapna a dunor iti ulo ken bagina.
Nakaro met a nadadael ti motorsiklona, nangruna iti sungo ti lugan.#