Motorista, DOA iti ospital

STA. CRUZ, Ilocos Sur – Saanen a naidanon a sibibiag ti maysa a motorista idinto a kritikal ti kasasaad ti kasakayna idi nakidinnungpar ti luganda iti maysa a kotse sadiay Barangay Sidaoen ditoy nga ili idi rabii ti Oktubre 14.

Naideklara a dead on arrival iti St. Martin Hospital, Candon City ni Jemar Garcia, 22, baro, ken residente iti Barangay Sagat, Tagudin, Ilocos Sur idinto a kritikal ti kondision ti kasakayna a ni Marwin Cabueños y Ili, 17, baro, ken residente iti Barangay Mambog, Sta. Cruz.

Naikustodia iti police station ditoy ni Edison Saydawan y Macaranas, 48, residente iti Tuding, Itogon, Benguet ken dagiti nainbolbar a behikulo para iti dokumentasion ken disposision.

Iti panagimbestiga dagiti polis, agpaamianan a direksion ti SYM motorcycle a minaneho ni Garcia ket idi makadanonda iti nakapasamakan ti aksidente, mapapati nga inobertekan ni Garcia ti maysa a lugan ket kimmaut iti bangir a linia ngem makasinnabatna gayam ti Hyundai Starex van a puon ti nagdinnungparanda.

Naipalladaw dagiti biktima iti kalsada gapu iti pigsa iti impact. Naitarayda iti St. Martin Hospital ngem DOA ni Garcia.#