Footer

Motorista, kasakayna, sinapgid kotse

SAN ILDEFONSO, Ilocos Sur – Imbes a tulonganna dagiti nasapgidna, tinarayan ketdi ti drayber dagiti biktima iti baet a nagsagrap dagitoy iti dunor iti nadumaduma a paset ti bagida.

Agpada a naitaray iti Metro Vigan Cooperative Hospital, Bantay, Ilocos Sur da Elison Valledor y Ancheta, 24, baro, ken residente iti Barangay Tamag, Vigan City, ken ni Chezka Roldan Palola, 23, balasang, residente iti Barangay Pussuac, Sto. Domingo, Ilocos Sur.

Iti pannakaisurat daytoy, di pay nabigbig ti drayber ti kotse a nangsapgid iti luganda.

Segun iti inisial a panagimbestiga dagiti polis, idi agarup 9:40 ti rabii ti Mayo 19,  agpaabagatan a direksion ti Yamaha Mio 125 a minaneho ni Valledor idinto a sarsarunuen ti Toyota Corolla ket idi makadanonda iti sakup ti Poblacion West,  nagobertek ti kotse ngem nasapgidna ti makannigid a sungo ti motorsiklo a puon ti nakapukawan ni Valledor iti kontrolna iti manibela ken nagkayaskasan ti motorsiklo agingga iti makinlaud nga abaga ti kalsada.

Imbes nga agsardeng, intuloy ketdi ti drayber a pinataray ti kotse nga immadayo#.