Motorista, nadunor iti aksidente

SINAIT, Ilocos Sur – Nayospital ti maysa a motorista kalpasan a naikras ti naglugananna a motorsiklo iti Barangay Paratong ditoy nga ili idi sardam ti Hunio 22.

Naikras ti Euro motorcycle 150 CC a minaneho ni Floro Agsalog y Barroga, 47, baro, ken residente iti Barangay Paratong ditoy nga ili, gapu iti pananglisina a madungpar ti Wing Van Truck a minaneho ni Benjamin Arellano Corpuz, 30, naasawaan, ken residente iti Barangay MinienWest, Sta. Barbara, Pangasinan.

Segun iti panagimbestiga dagiti polis, agsarsaruno ti dua a lugan nga agpaabagatan ket inobertekan ti truck ti motorsiklo ngem kellaat a nagsardeng sa nagibar iti akinlaud nga abaga ti kalsada.

Nagpreno ni Agsalog ngem napukawna ti kontrolna iti manibela ket naikras.

Na-impound dagiti dua a lugan iti police station.#