Motorista, nagudas iti aksidente

STO. DOMINGO, Ilocos Sur – Dead on arrival iti ospital a nakaitarayanna ti maysa a motorista kalpasan a nagsarili ti motorsiklona iti national highway a sakup ti Barangay Vacunero ditoy idi rabii ti Enero 27.

Naammuan iti panagimbestiga dagiti polis nga agpaabagatan a direksion ti Honda TMX a minaneho ni Edison Retuta y Retuta, 42, ken residente iti Barangay San Isidro, San Juan, Ilocos Sur idi aksidente a dinungparna ti kongkreto a poste ti street light iti lauden nga abaga ti kalsada.

Gapu iti pigsa ti pannungpar, nagsagrap ti biktima iti nakaro a dunor iti ulo ken bagina ket naitaray iti Tolentino Clinic and Hospital ngem indeklara ti doktor a nangtaming kenkuana nga awanen ti biagna.

Nakaro ti dadael ti motorsiko ti biktima.#