Motorista, naikras, pinilidan ti kotse

NARVACAN, Ilocos Sur – Natay ti maysa a motorista gapu iti pannakapilidna kalpasan ti pannakaikrasna maigapu iti pannakasab-itna iti maysa a traysikel idi agarup alas 7:45 ti rabii ti Marso 15 iti Barangay San Jose ditoy nga ili.

Nainaganan ti biktima a ni Mark Alones y Dela Cruz, 25, naasawaan, ken residente iti Barangay Bulanus ditoy nga ili.

Saan a naan-ano ti nagmaneho iti Yamaha RS a traysikel a ni Carlito Javier, Sr. y Cachola, 43, naasawaan, ken residente iti Barangay Cuddog ditoy met laeng nga ili ken ti nagmaneho iti Toyota Innova a minaneho ni Maynard Delos Reyes y Evandano, 30, baro, self-employed ken residente iti #54 Olivia St., Phase C, Vista Verde Executive Village, Cainta, Rizal.

Segun iti report, mapapati nga inobertekan ti motorsiklo ti traysikel ngem aksidente a nasapgidna daytoy a puon ti pannakaikras ti biktima iti kalsada ken iti pannakapilid kenkuana ti agpaabagatan a Toyota Innova.

Kabayatanna, dua ti natay idinto a nasugatan ti maysa iti panagdinnungpar ti maysa a lugan ken maysa a motorsiklo idi agarup alas 12:25 ti Marso 13 iti national highway a sakup ti Sitio Kakaldingan, Barangay Lungog ditoy nga ili.

Dagus a natay gapu iti nakaro a dunorna iti ulona ken bagina ni Noel Ascado y Alejo, 30, naasawaan, ken residente iti nadakamat a barangay gapu iti panagdinnungpar ti Motorstar 125 a motorsiklona ken ti Isuzu Elf a minaneho ni Eugenio Getteng Jr. y Agustin, 32, naasawaan, ken residente iti Payao, Batac, Ilocos Norte.

Naitaray met iti Central Ilocos District Hospital iti Paratong ditoy nga ili dagiti nakisakay iti motorsiklo a ni Marcelo Gazmen y Puyot, naasawaan ken Ricky Cabansag y Torres, naasawaan, residente met laeng iti nasao a barangay ngem pimmusay ni Gazmen bayat ti pannakatamingna iti ospital.

Naiyalis ni Cabansag iti Gabriela Silang General Hospital iti Vigan City.

Naammuan iti inisial nga inbestigasion dagiti polis nga agpaamianan ti motorsiklo idinto nga agpaabagatan ti Isuzu Elf ngem iti pagkurbaan ti kalsada a sakup ti nadakamat a sitio, mapapati a kimmaut ti motorsiklo iti linia ti Elf ket nupay nagpreno ti drayber ti Elf, nagdinnungpar latta dagiti dua a lugan.

Boluntario a simmuko ni Getteng ken ni PO2 Jojo Cauton ket naipaima iti Narvacan police station.#