TAGUDIN, Ilocos Sur – Natay ti maysa a motorista kalpasan a naitapuak iti rangtay iti Barangay Ag-aguman, ditoy nga ili idi parbangon ti Oktubre 17.
Naideklara nga awanen ti biag ni Rogieloy Navalta y Lubina, 18, baro, residente iti Barangay Pula, ditoy met laeng nga ili gapu kadagiti grabe a sugatna iti pannakaitapuakna iti waig a lima kadapan ti kaunegna.
Segun iti report, agsilsilaw iti tukak iti nadakamat a waig ni Larry Ballicong, 20, residente iti Barangay Cabaroan idi makitana ti nakagangat a motorsiklo.
Iti panagsukimat ni Ballicong, nakitana ti biktima a napandagan ken nairarem iti danum.
Naitaray ti biktima iti Tagudin General Hospital ngem indeklara ti doktor a nangtaming kenkuana a dead on arrival.#