Footer

Motorista, nakumpiskaan iti droga iti checkpoint

NARVACAN, Ilocos Sur – Maysa a motorista ti nasukalan nga adda ikutna a droga iti checkpoint sadiay Barangay Santa Lucia ditoy nga ili iti bigat ti Oktubre 24.

Bayat ti panagtsekpointda, pinasardeng dagiti polis ti maysa a maris berde a motorsiklo kalpasan a nakaawatda iti impormasion manipud iti maysa nga asset nga adda berde a motorsiklo a nagkarga iti droga.

Kiniddaw dagiti polis iti drayber ti motorsiklo a nabigbig idi agangay a ni Raymund Damasco y Taculod, 32, naasawaan, ken residente iti nadakamat a barangay, a luktanna ti compartment ti lugan a nakakitaanda iti maysa a bassit a heat sealed plastic sachet a mapapati a nagkarga iti droga nga agdagsen iti .3 gramo ken aluminum foil.

Gapu itoy, rinikisa dagiti polis ni Damasco ket nakakumpiskada iti aluminum foil iti makannawan a bulsa ti pantalon daytoy.

Naipan iti police station ti suspek para iti maikanatad a disposision ken pannakaamiris iti laboratorio ti droga a naala iti ikutna.#