Motorista, napaltogan sango ti balay ti barangay captain

CERVANTES, Ilocos Sur – Sanguanan a mismo ti barangay captain ti nakapaltogan ti maysa a motorista idi parbangon ti Marso 12.

Saan pay a nabigbig ti nangpaltog ken ni Joseph Puno y Oclud, 19, baro, ken residente iti Barangay San Juan, ditoy nga ili.

Segun iti report, daldaliasaten da Puno a nakalugan iti motorsiklona, ken da Samuel Manzano y Aquino, Efren Saldaan y Bal-Siing ken Arnel Niludan y Bacati a nakalugan iti traysikel ti Mankayan-Cervantes road ket idi makadanonda iti sanguanan ti balay ti barangay captain, pinaltogan ti di nabigbig a suspek ti komboy a nakapuntaan iti makannigid a saka ti biktima.

Intaray dagiti gagayyemna ni Puno iti Bessang Pass Memorial Hospital sa naiyalis iti Bauko Hospital, Bauko, Mt. Province para iti pannakaagasna.#