Motorista, nasarakan a bangkay iti kali

CANDON CITY – Maysa a motorista ti nasarakan a bangkay ken pinandagan ti motorsiklona iti maysa a kali iti nagbedgan ti Sitio Lusod, Barangay Calaoa-an ken Parioc 1st ditoy siudad idi agsapa ti Enero 22.

Nabigbig ti biktima babaen ti lisensiana a ni Bernard Laparejo y Mendoza, 23, naasawaan, SYM employee ken residente iti Parioc 2nd, ditoy siudad.

Segun iti amana a ni Pablo, pimmanaw ni Laparejo iti balayda idi malem ti Enero 21 tapno agatendar iti miting ngem saan a nakasangpet.

Kinuna ti pamilia ti biktima a nagipatulodda iti sumagmamano a text kenkuana ngem awan ti sungbatna. Uray idi timmawagda iti biktima, nagkiriring ti selpon daytoy ngem awan ti simmungbat.

Iti panagimbestiga dagiti polis, naammuan nga agpadaya a direksion ti biktima ket iti nagpikuran ti kalsada, mapapati a napukawna iti kontrolna iti manibela ti luganna ket naguyas ti lugan iti makannawan nga abaga ti kalsada sa natnag iti kali a nasurok a maysa a metro ti kaunegna.

Mapapati a naitupa ti ulo ti biktima ken natukkol ti tengngedna kas suportaran ti posisionna idi masarakan ti bangkayna.#