Motorista, natay gapu iti aksidente

NARVACAN, Ilocos Sur – Awanen ti biag ti maysa a motorista idi maidanon iti ospital gapuen iti pannakadungparna iti railing ti rangtay a nakaigapuan  iti pannakaitapuakna iti karayan iti asideg ti maysa a pantalan iti Barangay Sulvec ditoy.

Grabe dagiti sugat ni Virgilio Sobrepeña, Jr., residente iti Parparia ditoy nga ili, gapu iti pannakaaksidentena  a puon ti nakatayanna.

Nagresponde dagiti polis ditoy kalpasan a nakaawatda iti tawag manipud ken ni Barangay Captain ti Sulvec Mario Cabasal a maysa a lalaki a nakamotorsiklo ti naitapuak iti rangtay a kumamang iti Sulvec Port.

Iti panagpalutpot dagiti inbestigador, naammuan nga iti agarup alas 8 ti rabii ti Peb. 11, agdaldaliasat ni Sobrepeña a nakalugan iti Kawasaki a motorsiklona ngem nadungparna ti railing ti rangtay ket naipuruak ken naibaut ti ulona iti landok sa natnag iti karayan.

Grabe ti sugat iti ulo ken bagi ti biktima a puon ti ipapatayna.

Kabayatanna, insagad ti maysa a 10-wheeler truck ti maysa a traysikel agraman ti drayber iti junction iti Nanguneg East ditoy.

Segun iti report manipud iti polis ditoy, agsikko koma ti Isuzo 10-wheeler truck a minaneho ni Reynaldo Boso, 59, naasawaan, taga-Nueva Ecija iti junction nga agturong iti Barangay Cagayongan ditoy nga ili ket nasapgidna ti traysikel a minaneho ni Mario Dacquel, 38, naasawaan, residente iti Maynganay Sur, Sta. Maria, Ilocos Sur.

Gapu iti pannakaisagad ti luganna, nadunor ti ima ken saka ni Dacquel ket naitaray iti ospital.

Simmuko ti drayber ti truck iti polis ditoy ket inkarina a bayadanna ti nagastos ti biktima iti ospital agraman ti pannakatarimaan ti nadadael a traysikel.#